लिमा । पेरूका पूर्वराष्ट्रपति तानाशाह अल्बर्टो फुजिमोरी सन् २०२६ मा हुने दक्षिण अमेरिकी मुलुकको निर्वाचनमा सहभागी हुने भएका छन् ।
दक्षिण अमेरिकी देश पेरूको पपुलर फोर्स पार्टीका नेतासमेत रहेकी उनकी छोरी केइको फुजिमोरीले आइतबार सो जानकारी दिएकी हुन् ।
केइकोले भनिन्– ‘मेरो बुबा र मैले कुराकानी गरेका छौँ र उहाँले राष्ट्रपति पदको उम्मेदवार बन्ने निर्णय गर्नुभएको छ ।’
सन् १९९० देखि सन् २००० सम्म पेरूका राष्ट्रपति बनेका ८५ वर्षीय फुजिमोरीले पेरूको कम्युनिस्ट पार्टी (साइनिङ पाथ) को नेतृत्वमा सञ्चालित सशस्त्र सङ्घर्षलाई दमन गर्न अमेरिकाको सहयोग लिएका थिए । त्यस क्रममा उनले साइनिङ पाथको सशस्त्र युद्धलाई निर्ममतापूर्वक दबाएका थिए ।
सन् १९९१ र सन् १९९२ मा सेनाको डेथ स्क्वाडले गरेको नरसंहारको आरोपमा उनलाई सन् २००९ मा जेलसजाय भएको थियो । साइनिङ पाथ विरुद्धको अभियानका क्रममा उनको नेतृत्व रहेका समय एक बच्चासहित २५ जना मारिएका कारण उनीलगायत केही अधिकारीलाई फरक फरक जेलसजाय भएको थियो ।
सो अपराधमा दोषी ठहरिएका कारण सन् २०२६ को चुनावमा फुजिमोरी भाग लिन पाउँछन् वा पाउँदैनन् भन्ने स्पष्ट छैन । उनलाई गत वर्ष मानवीय कारण देखाउँदै जेलबाट रिहा गरिएको थियो ।
यसबारे पेरूको संवैधानिक अदालतका पूर्व न्यायाधीश अर्नेस्टो ब्लुमले प्रसारणकर्ता क्यानाल एनसँग भने– ‘मानवीय कारणले उहाँलाई माफी दिइएको हो तर यसको अर्थ उहाँको अपराध वा सजाय पूरा भएको वा खारेज भएको भन्ने होइन ।’
गत महिना घरमा लडेर कम्मर भाँचिएपछि उनलाई सघन उपचार कक्षमा राखी उपचार गरिएको थियो ।
पपुलर फोर्स पार्टीको केइकोले हालै आफ्ना पिता जिब्रोको ट्युमरबाट पीडित भएको बताइन् । (रासस/एएफपी)
