काठमाडौँ । राष्ट्रिय जनमोर्चाले बाढीपहिरोमा परेका जनताको उद्धार, राहत, क्षतिपूर्ति र स्वास्थ्योपचारमा ध्यान दिन आग्रह गरेको छ ।
अध्यक्ष चित्रबहादुर केसीको हस्ताक्षरमा २०८१ असार २८ गते शुक्रबार जारी प्रेसवक्तव्यमा राजमोले सो आग्रह गरेको हो ।
प्रेसवक्तव्यमा असार २८ गते बिहान पहिरोमा परेर दुईओटा यात्रुवाहक बस त्रिशुली नदीमा खसेको सन्दर्भमा बिपत् व्यवस्थापन, रोकथाम, उद्धार, राहत, क्षतिपूर्ति र स्वास्थ्योपचारमा बिनाभेदभाव ध्यान दिन आग्रह गरिएको छ ।
त्यस्तै, प्रेसवक्तव्यमा कास्की, म्याग्दी, बागलुङ, चितवनलगायतका जिल्लामा अविरल वर्षाका कारण बाढीपहिरोबाट निधन भएकोमा मृतकप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरिएको छ ।
यस्तो छ, प्रेसवक्तव्यको पूर्ण पाठ :
“आज बिहान अन्दाजी साढे तीन बजे पहिरोमा परेर दुईओटा यात्रुवाहक बस त्रिशुली नदीमा खसेका छन् यद्यपि अहिलेसम्म त्रिशुलीमा खसेका बस फेला पर्न सकेका छैनन् । ती बसमा झन्डै पाँच दर्जनभन्दा बढी यात्रुले यात्रा गरिरहेको समाचार सार्वजनिक भएको छ ।
नदीमा खसेका बसको खोजी कार्यलाई अझ तीव्रता दिन नेपाल सरकारसँग माग गर्दछौँ ।
अविरल वर्षाका कारण आएको बाढीपहिरोबाट कास्कीमा एउटै परिवारका सात, म्याग्दीमा दुई, बागलुङमा एक र चितवनमा एक जनाको मृत्यु भएको दुखद समाचार पनि सार्वजनिक भएको छ । मृतक सबैप्रति श्रद्धाञ्जली अर्पण गर्दै शोकसन्तप्त परिवारप्रति हार्दिक समवेदना प्रकट गर्दछौँ । देशका विभिन्न भागमा परेको अविरल वर्षाले निम्त्याएको बाढीपहिरोका कारण थुप्रै धनजनको क्षति हुन पुगेको छ । त्यसका साथै दर्जनौँ सडकसमेत पहिरोका कारण अवरुद्ध हुन पुगेका छन् । बाढीपहिरोमा परी घाइते हुनेहरूको यथोचित उपचारको व्यवस्था गर्न सरकारसँग माग गर्दै घाइतेको शीघ्र स्वास्थ्यलाभको कामना गर्दछौँ । बाढीपहिरोमा परी घरवारविहीन भएकालाई यथाशीघ्र राहतका साथै उचित बसोबासको व्यवस्था मिलाउन पनि सरकारलाई जोड दिन्छौँ । अवरुद्ध सडकका कारण आपूर्ति व्यवस्था नियमिततामा बाधा नपुगोस्, त्यसका साथै कालोबजारीले पनि प्रश्रय नपाओस् भन्नेतर्फ सरकारको ध्यानाकर्षण गराउँछौँ ।
मौसम विभाग, बिपत् व्यवस्थापन, रोकथाम, उद्धारलगायतका कार्यलाई अझै बढी सतर्क तीव्र पार्नुपर्नेे आवश्यकतामा जोड दिन्छौँ ।
त्यसका साथै उद्धारपछिको राहत, क्षतिपूर्ति तथा स्वास्थ्योपचारलगायतका विषयमा बिनाभेदभाव ध्यान दिनसमेत सरकारलाई हाम्रो पार्टीले जोड दिन्छ ।”
