काठमाडौँ । लघुकथाकार डा. पुष्करराज भट्टले नेपाली लघुकथामा प्रगतिशीलता एउटा प्रमुख चेतनाको रूपमा विकास भइसकेको दाबी गरेका छन् ।
प्रगतिशील लेखक सङ्घले २०८१ असार ७ गते शुक्रबार आयोजना गरेको “नेपाली लघुकथामा प्रगतिशीलता” विषयक बहत्तरौँ परिसंवादमा उनले सो धारणा राखेका हुन् ।
बागबजारस्थित प्रलेस कार्यालयमा भएको सो कार्यक्रममा डा.भट्टले सूत्रात्मक हुनु, आकस्मिक हुनु, व्यङ्ग्यात्मक हुनु, प्रहारक क्षमता हुनु लघुकथाको प्रमुख विशेषता भएको बताए ।
उनले भने– ;यस प्रकारको कथामा प्रारम्भमा कुनै घटनाको प्रारम्भ हुन्छ । घटनाको विकाससँग दुई भिन्न प्रवृत्तिका बिचमा सङ्घर्ष हुन्छ र अन्त्यमा फरक फरक विचार वा दृष्टिकोणसहित समापन हुन्छ ।’
‘लघुकथाको प्रारम्भ र मध्यमा जुन खाले विचार ह्न्छु, त्यसको अन्त्यमा फरक फरक विचार वा दृष्टिकोणसहित समापन हुन्छ’ उनले अगाडि भने– ‘लघुकथाको अन्त्यमा व्यङ्ग्य, विद्रोहका साथै सन्देशपरकता पाइन्छ । लघुकथा आफै दृष्टिकोण हो ।’
प्रलेसका अध्यक्ष डा. मधुसुदन गिरीको अध्यक्षता तथा उपाध्यक्ष नमुना शर्माको सञ्चालनमा अगाडि बढेको कार्यक्रममा कार्यक्रमका संयोजक समीर सिंहले विषयवस्तुका बारेमा प्रष्ट पारेका थिए ।
परिसंवाद कार्यक्रममा मातृका पोखरेल, गोपिरमण उपाध्याय, डा. हरिप्रसाद सिलवाल, डा. पूर्ण भण्डारी, जगत् वशिष्ठ, चेवनचन्द्र बस्नेत र केशु कार्कीले पूरक टिप्पणी गरेका थिए ।
