काठमाडौं । प्रधानमन्त्री पुष्यपकमल दाहाल प्रचण्डले चौथोपटक विश्वासको मत पाएका छन् । सोमबार बसेको प्रतिनिधि सभाको बैठकमा विपक्षी दलको नाराबाजीबीच प्रचण्डले चौथोपटक विश्वासको मत पाएका हुन् ।
प्रधानमन्त्री प्रचण्डले विश्वासको मतको पक्षमा १५७ मत मत प्राप्त गरे । प्रधानमन्त्रीले संविधानको धारा १०० को उपधारा ९२० बमोजिम विश्वासको मत लिएका हुन्।
प्रमुख प्रतिपक्षी दल नेपाली कांग्रेसहितका अन्य विपक्षी दलहरू मतदान कार्यमा सहभागी भएनन् भने मजदुर किसान पार्टीका सांसद प्रेम सुवालले पक्ष/विपक्ष दुवैतर्फ मत दिएनन् ।
प्रधानमन्त्रीले प्रतिनिधित्व गर्ने दल विभाजित भएमा वा सरकारमा सहभागी दलले आफ्नो समर्थन फिर्ता लिएमा तीस दिनभित्र प्रधानमन्त्रीले विश्वासको मतका लागि प्रतिनिधि सभा समक्ष प्रस्ताव राख्नुपर्ने संवैधनिक व्यवस्था छ।
जनता समाजवादी पार्टी, नेपालले गत वैशाख ३१ गते प्रधानमन्त्री प्रचण्ड नेतृत्व सरकारलाई दिएको समर्थन फिर्ता लिएको थियो। सो पार्टी विभाजित भएसँगै समर्थन फिर्ता लिएपछि प्रधानमन्त्री प्रचण्डले सोमबार विश्वासको मत लिएका हुन्।
सहकारी प्रकरण थप चर्काउने विपक्षी दलको निर्णय
विपक्षी दलहरूको अवरोधबीच प्रधानमन्त्री प्रचण्डले विश्वासको मत लिएपछि प्रमुख प्रतिपक्षी दल नेपाली कांग्रेससहितका विपक्षी दलहरूले सहकारी प्रकरणलाई थप चर्काउने भएको छन् ।
सोमबारको प्रतिनिधिसभा बैठकलगत्तै बसेको विपक्षी दलहरूको बैठकले सदन र सडक दुवैतिरबाट संसदीय छानबिन समिति माग गर्ने निर्णय गरेको छ।
बैठकले सभामुख देवराज घिमिरेको भूमिकामाथि समेत प्रश्न उठाएको राप्रपा प्रमुख सचेतक ज्ञानेन्द्रबहादुर शाहीले नेपालखबरलाई जानकारी दिए।
‘सहकारी प्रकरणमा थप सशक्त भएर प्रस्तुत हुन्छौँ,’ उनले भने, ‘हाम्रो बैठकले सभामुखको आफ्नो पदीय जिम्मेवारीमा रहनुभएन भन्ने निष्कर्ष निकालेको छ।’
