काठमाडौं । इरानी राष्ट्रपति इब्राहिम रइसी सवार हेलिकोप्टर दुर्घटनाग्रस्त भएको छ ।
हिजोदेखि हराइरहेको सो हेलिकोप्टरको भग्नावेशेष फेला परेको त्यहाँको सरकारी टेलिभिजनलाई उधृत गर्दै बीबीसीले जनाएको छ ।
अन्तर्राष्ट्रिय सञ्चारमाध्यहरूका अनुसार दुर्घटनास्थलमा ‘जीवनको कुनै सङ्केत नरहेको’ बताइएको छ।
हेलिकोप्टर ‘पूर्ण रूपमा जलेको’ रोयटर्सले जनाएको छ।
राष्ट्रपति चढेको हेलिकोप्टर पूर्ण रूपमा जलेको छ र दुर्भाग्यबस त्यसमा रहेका सबैको मृत्यु भएको ठानिएको एक अधिकारीले बताए ।
त्यसअघि इरानी राष्ट्रपति इब्राहिम रइसी र विदेशमन्त्री होसेन अमिराब्दोल्लाहियान चढेको हेलिकोप्टर दुर्घटनामा परेको इरानी सरकारी सञ्चारमाध्यमले जनाएका थिए।
इरानका आन्तरिक मामिलामन्त्री अहमद वाहिदीले राष्ट्रपति र विदेशमन्त्री हेलिकोप्टरमा यात्रारत रहेको पुष्टि गरेका थिए।
उक्त हेलिकोप्टरमा इरानको पूर्वी अजरबैजान प्रान्तका गभर्नर मलिक रहमतीसहित अन्य व्यक्तिहरू पनि चढेका थिए।
इरानको सरकारी सञ्चारमाध्यमका अनुसार हेलिकोप्टरले उडानका क्रममा कठिनाइको सामना गर्नु परेको थियो।
त्यसपछि उक्त हेलिकोप्टरले ‘हार्ड ल्यान्डिङ’ गर्नुपरेको इरानी सञ्चारमाध्यमहरूले जनाएका छन्।
उक्त हेलिकोप्टर इरानी उच्च अधिकारीहरू लिएर उडिरहेका अन्य दुईसमेत गरी तीन हेलिकोप्टरसँगै उत्तरी इरानको यात्रामा थियो।
मन्त्रीहरू र अन्य वरिष्ठ अधिकारी रहेका अन्य दुई हेलिकोप्टर भने सुरक्षित रूपमा गन्तव्यमा पुगेका छन्।
इरानी आन्तरिक मामिलामन्त्रीका अनुसार उद्धार टोली तत्काल सम्भावित घटनास्थलतर्फ लागेको थियो।
खराब मौसमका कारण घटनास्थलसम्म पुग्न कठिन भएको थियो।
उक्त क्षेत्रमा ४० भन्दा बढी उद्धार टोली खटाइएको छ। त्यसमा आपत्कालीन कार्यमा प्रयोग हुने ड्रोनहरूको पनि उपयोग गरिएको थियो।
यसअघि इरानीहरू उक्त घटनाबाट स्तब्ध भएको र राष्ट्रपतिसहित उनको टोलीका लागि प्रार्थना गरिरहेको विवरण आएका थिए।
