काठमाडौं । नेपाल कम्युनिस्ट पार्टी (मसाल) ले महामन्त्री मोहनविक्रम सिंह १६ औँ पटक महामन्त्री बनेको भनेर एक अनलाइनमा प्रकाशित समाचारमा सत्यता नरहेको स्पष्ट पारेको छ ।
प्रवक्ता रामप्रकाश पुरीले आइतबार (२०८१ वैशाख २ गते) एक स्पष्टीकर प्रकाशित गरी समाचारले दिग्भ्रमित पारेको बताउनुभएको छ ।
उहाँले सिंह ९ पटक पार्टी महामन्त्रीमा चुनिएको पनि स्पष्ट पार्नुभएको छ ।
साथै, उक्त समाचारमा ‘मोहनविक्रम सिंहले बताएको’ भनी उक्त सामग्रीमा उल्लेख गरिएका कतिपय अराजनीतिक र अशिष्ट भाषिकताप्रति दुःख व्यक्त गरिएको छ ।
यस्तो छ, स्पष्टीकरण
नेपालखबर अनलाइन पत्रिकामा २०८० चैत्र ३० गते प्रकाशित ‘५० वर्ष भूमिगत राजनीति, ९० वर्षमा सोह्रौँपटक महामन्त्री’ शीर्षकमा एक सामग्री प्रकाशित भएको छ । सामग्री प्रकाशित गर्नुभएकोमा हामीले उहाँहरुको सम्मान गर्दछौँ तर उक्त सामग्रीको शीर्षकबाट हाम्रो पार्टीका महामन्त्री कामरेड मोहनविक्रम सिंहबारे कतिपय दिग्भ्रम पैदा भएकोले स्पष्टताको लागि यो स्पष्टीकरण जारी गरिएको छ ।
का. मोहनविक्रम सिंह २०३१ सालमा सम्पन्न चौथो महाधिवेशनमा पहिलोपटक महामन्त्रीमा निर्वाचित हुनुभएको थियो । त्यसपछि २०४२ सालमा पार्टीमा फुट भएपछि सोही वर्षको मंसीरमा सम्पन्न चौथो राष्ट्रिय सम्मेलनबाट महामन्त्रीमा निर्वाचित हुनुभएको थियो । त्यसपछि उहाँ २०४८ मा सम्पन्न पार्टीको छैठौँ राष्ट्रिय सम्मेलन र २०५१ मा सम्पन्न छैठौँ महाधिवेशनबाट महामन्त्रीमा निर्वाचित हुनुभएको थियो । तत्पश्चात तत्कालीन नेकपा(एकता केन्द्र) र हाम्रो पार्टी ने.क.पा.(मसाल) बीच पार्टी एकता भई बनेको ने.क.पा. (एकताकेन्द्र–मसाल)को महामन्त्रीमा निर्वाचित हुनुभएको थियो । पछि तत्कालीन एकताकेन्द्र–मसालमा फुट भइसकेपछि २०६३ कार्तिकमा सम्पन्न एक राष्ट्रिय भेलाबाट पुनः महामन्त्रीमा निर्वाचित हुनुभएको थियो । तत्पश्चात सातौँ, आठौँ र नवौँ महाधिवेशनबाट उहाँ महामन्त्रीमा निर्वाचित हुनुभएको थियो । यसरी विभिन्न अवस्था र परिस्थितिबाट उहाँ ९ पटक महामन्त्रीमा निर्वाचित भएको स्पष्ट छ । तर १६ पटक महामन्त्री बनेको कुरा सत्य होइन । त्यसरी उक्त समाचारमा दिइएको त्यस प्रकारको भ्रमपूर्ण सम्प्रेषणप्रति हामीले दुःख व्यक्त गर्दछौँ ।
उक्त सामग्रीमा कतिपय सन्दर्भमा कामरेड मोहनविक्रम सिंहको व्यक्तित्वको अभिव्यक्तिसित नसुहाउने खालका अराजनीतिक र अशिष्ट शब्द पनि प्रयोगमा ल्याइएका छन् । अराजनीतिक र अशिष्ट प्रकारले कामरेड मोहनविक्रम सिंहले कुनै राजनीतिक संगठन, व्यक्ति वा कुनै पनि पक्षलाई आरोपित गर्ने प्रश्न नै हुँदैन । त्यसैले “मोहनविक्रम सिंहले बताएको” भनी उक्त सामग्रीमा उल्लेख गरिएका कतिपय अराजनीतिक र अशिष्ट भाषिकताप्रति हामीले दुःख व्यक्त गर्न चाहन्छौँ ।
२०८१ वैशाख ०२ गते ।
रामप्रकाश पुरी
प्रवक्ता
