काठमाडौँ । अखिल नेपाल प्रगतिशील लेखक सङ्घ (अन्पा), सुदूरपश्चिम प्रदेश समितिकी सचिव दीपिका भट्ट अस्ताउनुभएको छ ।
२०८० चैत २७ गते मङ्गलबार आफ्नै जिल्ला कैलालीमा उहाँको देहान्त भएको हो ।
उहाँको निधनप्रति अन्पाले शोक व्यक्त गरेको छ ।
अन्पाका अध्यक्ष समीर सिंहको हस्ताक्षरमा चैत २८ गते बुधबार शोकवक्तव्य जारी गर्दै उहाँप्रति श्रद्धाञ्जली व्यक्त गरिएको हो ।
प्रगतिशील लेखक सङ्घ कैलालीका अध्यक्षसमेत रहनुभएकी भट्टको निधनमा अन्पाद्वारा जारी शोकवक्तव्य यस्तो रहेको छ :
“अखिल नेपाल प्रगतिशील लेखक सङ्घ (अन्पा) को सुदूरपश्चिम प्रदेश समितिकी सचिव दीपिका भट्ट विवशको असामयिक निधन भएको छ ।
प्रगतिशील लेखक तथा साहित्यको क्षेत्रमा निरन्तर कलम चलाउँदै आउनुभएकी भट्टको अल्पायुमै भएको निधनले नेपालको प्रगतिशील साहित्यिक आन्दोलनमा ठुलो क्षति पुगेको छ । प्रलेस, कैलालीकी अध्यक्षसमेत रहेकी भट्टको निधनप्रति अखिल नेपाल प्रगतिशील लेखक सङ्घ हार्दिक श्रद्धाञ्जली व्यक्त गर्दै शोकसन्तप्त परिवारप्रति गहिरो समवेदना प्रकट गर्दछ ।”
उहाँको परिवारमा पति र एक छोरी रहेका छन् । स्मृतिशेष दीपिका नेकपा (मसाल) निकट वामपन्थी बुद्धिजीवी पिता आर.सी. भट्ट की छोरीसमेत हुनुहुन्थ्यो ।
