काठमाडौँ । राष्ट्रिय जनमोर्चाले २०६२–६३ सालको जनआन्दोलनद्वारा स्थापित गणतन्त्र खतम पार्ने राजावादी षडयन्त्र चकनाचुर पार्न अपिल गरेको छ ।
राजावादीहरूले चैत २७ गतेको कथित प्रदर्शनमा निषेधाज्ञा तोड्ने घोषणा गरेको सम्बन्धमा राजमोको यस्तो धारणा आएको हो ।
अध्यक्ष चित्रबहादुर केसीको हस्ताक्षरमा २०८० चैत २७ गते मङ्गलबार जारी प्रेसवक्तव्यमा राप्रपाको प्रदर्शनलाई देशको शान्तिसुव्यवस्था भङ्ग गर्नुका साथै जनआन्दोलनका उपलब्धि उल्ट्याउने षड्यन्त्र भइरहेको ठहर गरेको छ ।
यस्तो छ, प्रेसवक्तव्यको पूर्ण पाठ :
“यही चैत २७ गते राष्ट्रिय प्रजातन्त्र पार्टीद्वारा आयोजित कथित विरोध प्रदर्शनको क्रममा निषेधाज्ञालाई स्वीकार नगर्ने र त्यसलाई तोड्नेसमेतको उनीहरूको घोषणालाई राष्ट्रिय जनमोर्चाले गम्भीर रूपमा लिएको छ ।
कुनै निषेधाज्ञालाई स्वीकार नगर्ने र त्यसलाई तोड्ने राप्रपाको घोषणाले देशको शान्तिसुव्यवस्थालाई भङ्ग गरेर अशान्तिको अवस्था उत्पन्न गर्नका लागि खुल्ला चुनौती हो ।
लामो सङ्घर्षद्वारा स्थापित गणतन्त्र संविधान, धर्मनिरपेक्षतालाई खतम गरेर देशलाई प्रतिगमनतर्फ लैजानका लागि राजावादी शक्तिले योजनाबद्ध ढङ्गबाट काम गरिरहेका छन् । उनीहरूको त्यस प्रकारको प्रतिगामी गतिविधिलाई भारतीय साम्राज्यवादले पनि समर्थन गर्दै आएको छ ।
२०६२–६३ को ऐतिहासिक जनआन्दोलनका उपलब्धिमाथि प्रहार गरेर ती उपलब्धिलाई उल्टाउन चैत २७ गतेको कार्यक्रम आयोजना गरिएको कुरामा कुनै शङ्का छैन । राप्रपालगायत राजावादी शक्तिको गणतन्त्र खतम गर्ने षड्यन्त्रलाई चकनाचुर पार्न सम्पूर्ण गणतन्त्रवादी शक्ति एक हुनुपर्ने आवश्यकतामा राष्ट्रिय जनमोर्चाले जोड दिन्छ ।”
