काठमाडौं । रक्तिम सांस्कृतिक अभियानका पूर्व उपाध्यक्ष दलबहादुर विकलाई जापान नेपाली एकता समाजले आर्थिक सहयोग गरेको छ ।
शरीरका एक भागमा प्यारालाइसिसको समस्या देखिएपछि उपचाररत कलाकार विकलाई जापान नेपाली एकता समाजले दुई लाख चार सय ३१ रुपैयाँ सहयोग गरेको हो ।
एकता समाजले पठाएको सो रकम जैमुनी नगरपालिका वार्ड नं ५ का वडा अध्यक्ष गोपाल शर्मा मार्फत शनिबार हस्तान्तरण गरिएको समाजले जनाएको छ ।
समाजले यसकार्यमा समय र मेहनत लगाउनुहुने केन्द्रीय सदस्य मेघराज सापकोटा, जैमुनि नगरपालिका वार्ड नं ५ का वडा अध्यक्ष गोपाल शर्मा र उपचार ब्यबस्थापनमा रहनुहुने आकास गौतमलाई धन्यवाद समेत दिएको छ ।
केही समयदेखि अस्वस्थ भइ उपचार गराइरहेका जनवादी कलाकार विकको आर्थिक अवस्था कमजोर रहेकोले जापानमा संकलित रकमबाट उपचारमा सहयोग पुग्ने समाजले जनाएको छ । चर्चित जैमिनीघाट काण्डका चर्चित पात्र कलाकार दलबहादुरको नेपाली जनवादी संस्कृतिको क्षेत्रमा महत्वपूर्ण योगदान रहेको छ ।
