भीमदत्तनगर । सरकारले हमासको अपहरणमा परेका कञ्चनपुरका विपिन जोशीको सकुशल रिहाइका लागि सरकारको तर्फबाट प्रयास भइरहेको बताउनुभएको छ ।
परराष्ट्रमन्त्री नारायणप्रकाश साउदले २०८० पुस १५ गते आइतबार भीमदत्तनगरमा सामुदायिक रेडियो शुक्लाफाँटा एफएमको सत्रौँ वार्षिकोत्सवमा मन्तव्य राख्दै यस्तो दाबी गर्नुभएको हो ।
मन्त्री साउदले सरकारले जोशीको रिहाइका लागि शक्ति राष्ट्रसँग निरन्तर पहल गरिरहेको जानकारी दिनुभयो ।
‘इजरायल सरकारसँग पनि विपिनको रिहाइका लागि पटक पटक आग्रह गरेका छौँ’ उहाँले भन्नुभयो– ‘प्यालेस्टाइनसँग राम्रो सम्बन्ध रहेको कतारसँग म आफै गएर त्यहाँका प्रधानमन्त्री र विदेशमन्त्रीसँग आग्रह गरेको छु ।’
उहाँले दोस्रो युद्धविराममा विपिनको रिहाइ हुनेमा आश्वस्त पार्नुभयो ।
त्यस अवसरमा विपिनका आमाबुबाले मन्त्री साउदसँग भेट गरी छोराको जीवनरक्षाका लागि पहल गरिदिन आग्रह गर्नुभएको थियो ।
‘कतारले दोस्रो युद्धविरामका लागि आफूहरू प्रयासरत रहेको जवाफ दिएको छ । दोस्रो युद्धविराममा विपिन सकुशल फर्किने अपेक्षा छ’ उहाँले भन्नुभयो– ‘पहिलो चरणमा महिला र बालिबालिका प्राथमिकतामा परेको र अब विपिनको रिहाइ हुनेमा आशावादी छौँ ।’
उहाँले नेपाली विद्यार्थीले इजरायलमा ज्यान गुमाउनु परेको भन्दै दु:ख व्यक्त गनुभयो । (रासस)
