काठमाडौँ । राष्ट्रिय जनमोर्चाले धनकुटामा एमाले अध्यक्ष ओलीमाथि पहिचानवादीले गरेको हातपातको घोर विरोध तथा भत्र्सना गरेको छ ।
अध्यक्ष चित्रबहादुर केसीको हस्ताक्षरमा २०८० पुस १ गते आइतबार प्रेसवक्तव्य जारी गर्दै राजमो उक्त घटनाको विरोध गरेको हो ।
नेपालमा पहिचानवादी गतिविधिलाई ‘विखण्डनकारी’ सङ्ज्ञा दिइएको उक्त वक्तव्यमा त्यस्ता अराजक गतिविधिका विरुद्ध सम्पूर्ण
वामपन्थी तथा लोकतान्त्रिक शक्तिहरू एकजुट हुनुपर्ने आवश्यकता औल्याइएको छ ।
यस्तो छ, राजमोको पूर्ण वक्तव्य :
“पूर्वप्रधानमन्त्री तथा नेकपा (एमाले_ का अध्यक्ष केपी शर्मा ओलीमाथि धनकुटा जिल्लामा भएको एउटा सार्वजनिक कार्यक्रममा कथित पहिचानवादीले सुनियोजित ढङ्गबाट गरेको हातपातको हाम्रो पार्टी राष्ट्रिय जनमोर्चाले घोर विरोध तथा भत्र्सना गर्दछ ।
कोशी प्रदेश, तराईका कतिपय जिल्लामा विगत केही महिनादेखि साम्प्रदायिक सद्भाव भड्काउने खालका गतिविधि तथा षड्यन्त्र भइरहेका छन् । पश्चिमा साम्राज्यवादी शक्तिले विखण्डनको उद्देश्य प्राप्त गर्न इसाई धर्मलाई तथा भारतीय संस्थापन पक्षले हिन्दु धर्मलाई आफ्नो हतियार बनाएको कुरा कसैबाट लुकेको छैन । नेपालमा भइरहेको इसाईकरणको विरोधको निहुँमा बाँकेको नेपालगञ्ज, पूर्वी पहाड तथा तराईलगायतका जिल्लामा योजनाबद्ध ढङ्गबाट भारतीय संस्थापन पक्षले कथित हिन्दुत्वको राजनीतिलाई अगाडि बढाउने प्रयत्न गरेको कुरा प्रष्टै देखिन्छ । यो अवस्थामा त्यस प्रकारका विखण्डनकारी गतिविधिलाई निस्तेज पार्न सम्पूर्ण वाम तथा लोकतान्त्रिक शक्तिहरू एक ठाउँमा उभिनुपर्ने आवश्यकता छ । धर्म वा जातिलाई राजनीतिसँग जोडेर गरिने गतिविधिले सर्वप्रथम वामपन्थी र क्रमशस् लोकतान्त्रिक तथा विभिन्न दललाई खतम गरेर देशमा फासिवाद कायम गर्ने गरेको धार्मिक तथा जातीय फासिवादको विगतको इतिहासमाथि ध्यान दिँदा नेपालमा भइरहेका त्यस प्रकारका गतिविधिलाई हल्का रूपमा लिनु गलत हुने छ ।
अन्तमा, हामीले कथित विखण्डनकारीलाई यस प्रकारका अराजक गतिविधि रोक्न जोड दिँदै उनीहरूका अराजक गतिविधिका विरुद्ध सम्पूर्ण वाम तथा लोकतान्त्रिक शक्तिलाई एकजुट हुन आह्वान गर्दछौँ ।”
