सन्तोष सुनार, सन्धिखर्क ।
राष्ट्रिय जनमोर्चा अर्घाखाँचीका सदस्य धनबहादुर खत्रीको २०८० मङ्सिर ३० गते बिहान निधन भएपछि गच्छेघाटमा दाहसंस्कार गरिएको छ ।
लिभरको समस्याबाट उहाँ लामो समयदेखि बिरामी खत्रीको काठमाडौँ उपचार गराई घर फर्किएपछि आफ्नै निवास अर्घाखाँचीमा निधन भएको हो ।
दाहसंस्कारपूर्व उहाँको शवमाथि नेकपा (मसाल) अर्घाखाँचीका प्रवक्ता पशुपति ढकालले पार्टीको झन्डा ओढाउनुभएको थियो ।
राजमो जिल्ला अध्यक्ष थम्मन केसीले श्रद्धाञ्जली मन्तव्य राख्दै स्मृतिशेष खत्रीले निजामती सेवा रहेर देशको न्यायपूर्ण आन्दोलनमा निभाउनुभएको भूमिकाको प्रशंसा गर्नुभएको थियो ।
त्यसैगरी दाहसंस्कारस्थलमा राजमो प्रदेश सल्लाहकार शेरबहादुर बिसी, जिल्ला उपाध्यक्ष गोपाल पौडेल, जिल्ला कोषाध्यक्ष गोविन्द बिसी, नेकपा (एमाले) का जिल्ला समन्वय समितिका सदस्य लक्ष्मण कँडेल, नेपाली काङ्ग्रेसका जिल्ला सदस्य गोपाल भुसाल, नेकपा (माओवादी–केन्द्र) का वडाइन्चार्ज बाबुराम आचार्य र सन्धिखर्क नगरपालिका–७ का वडाअध्यक्ष चुराबहादुर केसी, वामपन्थी नेता पीताम्बर भट्टराई, राजमो र अन्य भ्रातृ सङ्गठनका नेताकार्यकर्ता, पत्रकार र आफन्तजनले श्रद्धाञ्जली दिनुभएको थियो ।
दाहसंस्कारपूर्व उहाँको श्रद्धाञ्जलीस्वरूप एक मिनट मौनधारण गरिएको थियो ।
खत्री जिल्ला प्रशासन कार्यालय अर्घाखाँचीका स्थायी कर्मचारी ६२ वर्षीय स्मृतिशेष खत्री सन्धिखर्क नगरपालिका वडा नम्बर ७ डिहिडाँडामा बस्दै आउनुभएको थियो । उहाँको परिवारमा पत्नीका साथै दुई छोराहरू हुनुहुन्छ ।
