काठमाडौं । काठमाडौंमा एक जनालाई कोरोना संक्रमण भएको पुष्टि भएको छ । फ्रान्सबाट आएकी एक १९ वर्षीया विद्यार्थीलाई कोरोना संक्रमण भएको स्वास्थ्य तथा जनसंख्या मन्त्रालयले जनाएको छ ।
टेकु अस्पतालमा उपचाररत ति नेपालीमा भाइरस संक्रमणको पोजिटिभ रिपोर्ट आएको स्वास्थ्य मन्त्रालयका प्रवक्ता विकास देवकोटाले जानकारी दिनुभयो ।
स्वास्थ्य मन्त्रालयमा आयोजित पत्रकार सम्मेलनमा स्वास्थ्यमन्त्री भानुभक्त ढकालले उनी विद्यार्थी रहेको र फ्रान्सबाट आएको बताउनुभयो ।
संक्रमित विद्यार्थीको परिवारलाई पनि आइसोलेसनमा राख्ने तयारी र सँगै आएका साथीका बारेमा पनि सोधखोज भइरहेको मन्त्री ढकालको भनाई छ ।
फ्रान्स कोरोना भाइरसबाट सबैभन्दा प्रभावित राष्ट्रमध्ये एक हो। त्यहाँ १६ हजार १८ जना कोरोनाबाट संक्रमित छन्। ६ सय ७४ को मृत्यु भइसकेको छ ।
हाल टेकुको अस्पतालमा दश शय्याको आइसियु निर्माण जारी रहेको र सामान खरिद प्रक्रिया अघि बढाइएको पत्रकार सम्मेलनमा जानकारी दिइयो ।
