दाङ । राष्ट्रिय जनमोर्चाका नेता एवं प्युठान जिल्ला साबिक दाङबाङ गाउँ विकास समितीका पूर्व उपाध्यक्ष लुमकान्त सुबेदीको सम्झनामा दाङमा श्रद्धाञ्जली सभाको आयोजना गरिएको छ । राजमो दाङले उहाँकै निवास लमही नगरपालिका २ बनकट्टामा श्रद्धाञ्जली सभाको आयोजना गरेको हो ।
कार्यक्रममा नेता सुवेदीको फोटोमा माल्यार्पण गर्दै राष्ट्रिय जनमोर्चाका जिल्ला अध्यक्ष गणेश आचार्यले लुमाकान्त सुवेदी गलत विचारका विरुद्ध सतिसाल जस्तै उभिने गरेको भन्दै यस्तै मान्छे मात्र सम्मान गर्न लायक हुने बताउनुभयो ।
उहाँले लुमकान्त सुवेदीको सम्मानको लागि गतल बिचार बोक्नेको समर्थन होइन त्यसका विरुद्ध उभिएर उहाँको बाटो समाउन सक्नु पर्ने बताउनु भयो । मृत्यु सस्कारको बारेमा कुरा गर्दै यसलाई पनि समयानुकुल परिवर्तन गर्दै जानुपर्ने उहाँको भनाई थियो ।
सुवेदीका जेठा छोरा दधिराम सुवेदीको अध्यक्षतामा भएको कार्यक्रममा अखिल नेपाल युवक संघका पूर्व केन्द्रीय अध्यक्ष तथा उहाँका आफन्त कासिनाथ पोख्रेलले लुमकान्त सुवेदीको जिवनी र व्यक्तित्वबारे स्पष्ट पार्नुभएको थियो । लेखराज आचार्यको सञ्चालनबाट अगाडि बढेको कार्यक्रममा राजमो लमही नगर अध्यक्ष हरि थापालेसमेत मन्तव्य राख्नु भएको थियो ।
कार्यक्रममा राजमो जिल्ला सचिव वसन्त पौडेल, सचिवालय सदस्य पदम गोराथोकी र सदस्य कुलचन्द्र पोख्रेल लगायत नेता कार्यकर्ता र आफन्तहरुको आतिथ्यता रहेको थियो ।
