काठमाडौँ । चिकित्सा शिक्षा सुधारका अभियन्ता डा. गोविन्द केसीले आगामी साउन २९ देखि सत्याग्रहको घोषणा गरेका छन् ।
२०८० साउन १५ गते सोमबार काठमाडौँमा पत्रकार सम्मेलन गर्दै डा. केसीले चिकित्सा शिक्षा आयोगलाई निस्तेज पार्ने र चिकित्सा शिक्षा ऐनका प्रावधानहरू उल्ट्याउने सङ्गठित प्रयास भइरहेको भन्दै सत्याग्रह सुरु गर्ने घोषणा गरेका हुन् ।
डा. केसीले आयोगका सहअध्यक्षसमेत रहेका शिक्षा विज्ञान तथा प्रविधिमन्त्रीसमेत पदीय जिम्मेवारीबाट च्यूत भएर माफियाहरूको त्यस्तो प्रयासमा साथ दिइरहेको आशङ्का उत्पन्न भएको बताए ।
स्वास्थ्य शिक्षाका विभिन्न विषयमा सिटिइभिटीमा भर्ती भएका पार्टी कार्यकर्ता तथा माफियाले अवैध रूपमा अघि बढाएको सिट निर्धारण र भर्ना प्रक्रिया रोक्न शिक्षामन्त्रीले केही नगर्नु तथा उनीहरूलाई दण्डित गर्नुको सट्टा संरक्षण गर्नुले त्यस्तो आशङ्का जन्माएको बताए ।
‘दलीय कार्यकर्ता भर्ती केन्द्र बनेका राज्यका अरू नियामक निकायसमेत चिकित्सा शिक्षा आयोगलाई अटेरी गरेर मेडिकल माफियाको भाषा बोल्नु संयोग मात्रै नभई मेडिकल शिक्षा सुधारमा अहिलेसम्म भएको सुधारलाई उल्ट्याउने भ्रष्ट र आपराधिक प्रवृत्तिका राजनीतिक दलहरूको सङ्गठित प्रयास भएको देखिन्छ’ डा. केसीले भने– ‘त्यसैले सिटिइभिटीको सिट निर्धारण र विद्यार्थी भर्नासम्बन्धी अवैध निर्णय खारेज गर्न, दोषी पदाधिकारीलाई बर्खास्त गर्न तथा चिकित्सा शिक्षा आयोगका उपाध्यक्ष नियुक्तिका लागि एक हप्ताभित्र सिफारिस समिति बनाउन र हालका उपाध्यक्षको पदावधि सकिनुअगाडि नै छनोटको प्रक्रिया टुङ्ग्याएर आयोग एक दिन पनि नेतृत्वविहीन नहुने गरी नियुक्ति गर्न सरकारलाई अल्टिमेटम दिन चाहन्छौँ ।’
