शङ्करप्रसाद पोख्रेल, बुटवल ।
राष्ट्रिय जनमोर्चा रुपन्देही बुटवल–२ वडा समितिको आयोजनामा पहिरोबाट क्षति भएको स्थान पाखापानी चुरे पहाडमा वृक्षरोपण कार्यक्रम सम्पन्न भएको छ ।
कम्युनिस्ट सङ्ग्रहालयका अध्यक्ष चेतनाथ आचार्य, राजमो रुपन्देही जिल्ला अध्यक्ष टानबहदुर केसी र वडाअध्यक्ष सुनिल शाक्यले संयुक्त रूपमा बिरुवा रोप्दै २०८० साउन १२ गते शुक्रबारका दिन उक्त कार्यक्रम सम्पन्न भएको हो ।
कार्यक्रममा बोल्दै वडाअध्यक्ष सुनिल शाक्यले राष्ट्रिय जनमोर्चाको आयोजनामा वातावरण जोगाउने, भूक्षय रोक्न वृक्षरोपण कार्यक्रम गरेकोमा प्रसन्नता व्यक्त गर्नुभयो ।
वृक्षरोपण मात्र गरेर नहुने भन्दै उहाँले यसलाई जोगाउन पनि सबै मिलेर पहल गर्नुपर्ने बताउनुभयो ।
कार्यक्रममा बुटवल–२ की जनप्रतिनिधि गङ्गा घिमिरे, मनकामना–१ टोलकी अध्यक्ष लिशा पौडेल, राजमो प्युठान–रुपन्देही सम्पर्क समितिका अध्यक्ष कृष्णबहादुर जिसी, पत्रकार शिशिर पोख्रेललगायतको उपस्थिति रहेको थियो ।
कार्यक्रमको अध्यक्षता केसरबहादुर रानाले तथा सञ्चालन राजमो रुपन्देहीका सचिव कृष्णप्रसाद पोख्रेलले गर्नुभएको थियो ।
कार्यक्रममा पाखापानीस्थित स्थानीय बासिन्दा र राजमोका स्थानीय नेताकार्यकर्ताको उपस्थिति रहेको थियो ।
बुटवल उपमहानगरपालिका वडा नं. २ स्थित पाखापानीमा पर्ने चुरे पहाडमा केही बर्ष पहिलेदेखी नै पहिरो गएको थियो । पहिरोको कारण पाखापानीको बस्ती नै धरापमा परेको थियो ।
