बेइजिङ । उत्तरपूर्वी चीनमा एक विद्यालयको व्यायामशालाको लागि बनाइएको हलको छाना भत्किँदा ११ जनाको मृत्यु भएको छ ।
हेइलोङजियाङ प्रान्तको किकिहारमा निर्माणकर्मीले भवनको छतमा पानी जम्मा गर्न अवैध रूपमा संरचना बनाएको र अत्यधिक भारका कारण उक्त भवन भत्किएको हो ।
सिसिटिभीले प्रसारण गरेको फुटेजमा कङ्क्रिटको स्ल्याबबाट बनेको छाना पूरै ढलेकोे देखिएको छ । उद्धारकर्मीले पीडितसम्म पुग्नका लागि कङ्क्रिट र घुमाउरो धातुको ठुलो टुक्रा तोडेको फुटेजले देखाएको छ । दुर्घटनामा परी ११ जनाको मृत्यु भएको जनाइएको छ ।
दुर्घटनाको गहन अनुसन्धान भइरहेको र निर्माण कम्पनीका प्रमुखलाई प्रहरी हिरासतमा राखिएको जनाएका छन् । ३४ नम्बर को मिडिल स्कुलको जिम आइतबार दिउँसो ३ बजेतिर ढलेको थियो ।
स्थानीय पत्रिका हेइलोङजियाङ डेलीका अनुसार दुर्घटना हुँदा १९ जना जिममा थिए । चार जनालाई भग्नावशेषबाट बाहिर निकालिएको र अन्य चार जनाले दुर्घटनापछि भागेर ज्यान बचाउन सफल भएका छन् ।
करिब १६० अग्निनियन्त्रक र ३९ ओटा फायर ट्रकको खोजी तथा उद्धार कार्य सम्पन्न भएको जनाइएको छ । थुप्रिएका सामग्रीको बारेमा भत्किनुअघि नै चिन्ता व्यक्त गरिएको थियो ।
‘व्यायामशाला २० वर्षभन्दा पहिले निर्माण गरिएको थियो र धेरै ठाउँ लामो समयदेखि जीर्ण अवस्थामा पुगेको थियो । छतमा थुप्रिएका सबै सामानले केही न केही होला कि भनेर सबै चिन्तित थिए ।
गत महिना चीनको उत्तरपश्चिमी क्षेत्रमा रहेको बारबेक्यु रेस्टुरेन्टमा भएको विस्फोटमा ३१ जनाको मृत्यु भएको थियो भने
कार्यस्थलको सुरक्षाका लागि राष्ट्रव्यापी अभियान सञ्चालन गर्ने औपचारिक प्रतिबद्धता व्यक्त गरिएको थियो ।
गत अप्रिलमा बेइजिङको एक अस्पतालमा भएको आगलागीमा परी २९ जनाको मृत्यु भएको थियो भने केहीले झ्यालबाट हाम फालेर भाग्न सफल भएका थिए ।
सन् २०१५ मा तियानजिनमा रासायनिक गोदाममा भएको ठुलो विस्फोटमा कम्तीमा १६५ जनाको मृत्यु भएको थियो । यो चीनमा भएको सबैभन्दा खराब दुर्घटनामध्ये एक हो । (रासस/एएफपी)
