वासिङ्टन । अमेरिकामा बन्दुक हिंसा बढ्दै जान थालेको छ । त्यस क्रममा जर्जिया राज्यमा शनिबार बिहान भएको गोलीकाण्डमा चार जनाको मृत्यु भएको छ ।
जर्जियाको राजधानी एट्लान्टाबाट ४५ किलोमिटर टाढा दक्षिणपश्चिमी हेनरी काउन्टीको ह्याम्पटनको डगवुड लेक्स क्षेत्रमा गोली हानाहानमा तीन जना पुरुष र एक महिलाको हत्या भएको हो ।
एकचालिस वर्षीय आक्रमणकारी आन्द्रे लङ्मोरको खोजी भइरहेको प्रहरीले जनाएको छ । निजका बारेमा जानकारी भएमा प्रहरीलाई सम्पर्क गर्न सर्वसाधारणमा अनुरोध गरिएको छ । प्रहरीले सामाजिक सञ्जालमा जारी गरेको सूचनामा निजको नजिक जानुको सट्टा प्रहरीलाई खबर गर्न आग्रह गरिएको छ ।
यो वर्ष अमेरिकामा बन्दुक हिंसाका तीन सय ८२ घटना भएको गैरनाफामुखी समूह गन भायलेन्सले आफ्नो पछिल्लो प्रकाशनमा उल्लेख गरेको छ ।
यसैबिच, अमेरिकी समाचार संस्था एपीले बन्दुक हिंसाबारे प्रकाशन गरेको एक समाचारमा गत छ महिनामा भएका आम नरसंहारका २८ ओटा घटनामा एक सय ४० जनाले ज्यान गुमाएका जनाइएको छ । (रासस/सिन्ह्वा)
