काठमाडौँ । आई.सी.सी. एकदिवसीय विश्वकप छनोटअन्तर्गत सातौँ स्थानका लागि भएको प्लेअफ सेमिफाइनलमा नेपालले युएईलाई ३ विकेटले हराएको छ ।
जिम्बाव्वेको हरारेमा जितका लागि पाएको १८२ रनको नेपालले चवालिसौँ ओभरमा भेट्याएको हो ।
१०६ रन बनाउँदा ७ विकेट गुमाएर दबाबमा परेको नेपाललाई दीपेन्द्रसिंह ऐरी र सन्दीप लामिछानेले आठौं विकेटका लागि नट आउट ७९ रनको साझेदारी गर्दै जिताएका हुन् । ऐरी ७९ रनमा र लामिछाने २३ रनमा नट आउट रहेका थिए ।
यसअघि कुशल भुर्तेल ३५, ज्ञानेन्द्र मल्ल १३ तथा गुल्सन झा १२ रनमा आउट भएका थिए । अरू ब्याटरले दोहोरो अङ्कमा रन बनाउन सकेका थिएनन् ।
१० टोली सम्मिलित विश्वकप छनोटमा सुपर सिक्समा पुग्न असफल भएपछि मुख्य स्पर्धाबाट बाहिरिए पनि नेपालले सातौँ स्थानको प्लेअफ सेमिफाइनलमा युएईसँग खेलेको थियो । नेपालले अब सातौँ स्थानका लागि आयरल्यान्डसँग खेल्ने छ ।
