काठमाडौँ । स्वास्थ्य तथा जनसङ्ख्यामन्त्री मोहनबहादुर बस्नेतले भोलि २०८० असार १४ गते बिहीबारदेखि सरकारी अस्पतालमा विपन्न, असहाय र बेवारिसे बिरामीको उपचारका लागि दुई हजार २८ शैया नि:शुल्क गरिने बताउनुभएको छ ।
बिहीबारदेखि उपत्यकाका गङ्गालाल हृदयरोग केन्द्र, प्रसूतिगृह, कान्तिबाल र शुक्रराज ट्रपिकल सरुवा रोग अस्पतालले विपन्नका लागि नि:शुल्क शैया उपलब्ध गराउने उहाँले जानकारी दिनुभयो ।
‘कान्तिबाल अस्पतालले ६० शैया, परोपकार प्रसूति तथा स्त्री रोग अस्पतालले चार सय ५० शैया, ट्रमा सेन्टरले एक सय ५० शैया र सहिद गङ्गालाल हृदयरोग केन्द्रले ९० शैया नि:शुल्क गर्ने निर्णय गरेका छन्’ मन्त्री बस्नेतले भन्नुभयो ।
उहाँका अनुसार अहिलेसम्म विपन्नका लागि नि:शुल्क घोषणा गरिएका शैयाको सङ्ख्या दुई हजार २८ पुगेको छ ।
‘वीर अस्पतालले सात सय शैया र कोशी अस्पतालले तीन सय ३० शैया नि:शुल्क उपलब्ध गराउने यसअघि नै घोषणा गरिसकेका छन्’ मन्त्री बस्नेतले भन्नुभयो ।
उहाँले विस्तारै देशभरिका केन्द्रीय अस्पतालमा विपन्नका लागि नि:शुल्क शैया थप्दै जाने र ती शैयामा उपचार पनि नि:शुल्क हुने जानकारी दिनुभयो ।
शैया नि:शुल्क गरेपछि अस्पतालमाथि पर्ने आर्थिक भार कम गर्नका लागि केही बजेट सम्बन्धित अस्पतालले व्यवस्थापन गर्ने र अपुग रकम स्वास्थ्य मन्त्रालयले बेहोर्ने गरी काम भइरहेको मन्त्री बस्नेतले बताउनुभयो ।
स्वास्थ्य उपचार पाउनु जनताको संवैधानिक अधिकार भएकाले उक्त निर्णय सबै अस्पतालले कार्यान्वयन गर्नुपर्नेमा उहाँले जोड दिनुभयो ।
निजी अस्पताल पनि जिम्मेवार भई नियमअनुसार कुल शैयाको १० प्रतिशत विपन्नका लागि नि:शुल्क छुट्याउनुपर्ने भन्दै मन्त्री बस्नेतले १० प्रतिशत शैया नि:शुल्क गर्ने नियम कडाइका साथ कार्यान्वयन गराइरहेको बताउनुभयो ।
