दाङ। राष्ट्रिय जनमोर्चाका कार्यकारी अध्यक्ष रश्मीराज नेपालीले प्रधानमन्त्री केपी शर्मा ओली आफ्नो सत्ता टिकाउन सीमा अतिक्रमण प्रति मौनता साँधेको आरोप लगाउनुभएको छ । बिहीबार सीमा अतिक्रमण र एमसीसी विरुद्ध आयोजित विरोध सभालाई सम्बोधन गर्दै कार्यकारी अध्यक्ष नेपालीले राष्ट्रवादी छवी बनाएका ओली सत्ता टिकाउन भारतसँग लम्सार परेको बताउनुभयो ।

सीमा अतिक्रमण विरुद्ध जनताले आन्दोलन गरिरहने तर शासक चुप लाग्ने प्रवृत्तिका कारण भारतले अतिक्रमण बढाउँदै लगेर कालापानी लगायतको ठुलो भूभाग आफ्नै नक्सामा सामेल गरेको बताउनुभयो । देशको माटो बचाउन जनता नै जागरुक बन्नुपर्ने उहाँको भनाई थियो ।

यस्तै, कार्यकारी अध्यक्ष नेपालीले एमसीसी जस्तो राष्ट्रहित विपरितको सहमतिलाई संसदबाट पास गराउने प्रयास आपत्तिजनक रहेको बताउनुभयो । उहाँले सारा जनता र पार्टी भित्रैबाट पनि एमसीसी विरुद्ध आवाज उठिरहेका बेला सरकारले जवर्जस्ती पारित गराउन खोज्नुको कारण के हो भनी प्रश्न पनि गर्नुभयो ।

एमसीसी र सीमा अतिक्रमण विरुद्ध राष्ट्रियस्तरमा नेकपा (मसाल) सहितका १० दलले देशब्यापी विरोध प्रदर्शन गर्दै आइरहेका छन् । सोही कार्यक्रम अन्तर्गत बिहीबार भालुवाङमा विरोध सभा गरिएको हो। सभामा अखिल नेपाल किसान महासंघका केन्द्रीय कोषाध्यक्ष प्रेम नारायण आचार्यले सम्बोधन गर्नुभएको थियो ।

राजमो जिल्ला सल्लाहकार नर बहादुर केसीले स्वागत गर्नु भएको सभाको सञ्चालन अर्का सल्लाहकार रमेशमान गुरुङले गर्नु भएको थियो । राष्ट्रिय जनमोर्चा राप्ती गाउँपालिकाका अध्यक्ष केशवराज खनालको अध्यक्षतामा सो कार्यक्रम सम्पन्न भएको हो ।