काठमाडौँ । नेपालमा आँखा जाँच गरिएका बालबालिकामध्ये चार प्रतिशतमा दृष्टिदोषको समस्या देखिएको छ ।
नेपाल नेत्रज्योति सङ्घ र अर्विसको सहकार्यमा २०८० असार ६ गते बुधबार सञ्चालित नेपाल रिच परियोजनाबाट करिब आठ लाख बालबालिका लाभान्वित भएका छन् ।
अर्विसको आर्थिक सहयोगमा सङ्घले सञ्चालन गरेको उक्त परियोजनामार्फत झापा, मोरङ, पर्सा, सुनसरी र सिराहा जिल्लाका सात लाख ८५ हजार चार सय ६० बालबालिकाको नि:शुल्क आँखा परीक्षण गरिएको हो ।
सन् २०१८ देखि २०२२ सम्म सञ्चालित परियोजनामार्फत ६ देखि १८ वर्षसम्मका विद्यालय जाने र नजाने बालबालिकाको आँखा परीक्षण गरिएको थियो ।
सङ्घका कार्यक्रम व्यवस्थापक रञ्जन शाहले आँखा परीक्षण पश्चात् समस्या देखिएका बालबालिकालाई नि:शुल्क चस्मा तथा शल्यक्रियासमेत गरिएको बताउनुभयो ।
उक्त परियोजनामार्फत चार वर्षमा दुई हजार पाँच सय ५५ ओटा निजी तथा सामुदायिक विद्यालयमा आँखा जाँच गरिएको थियो ।
उहाँले उक्त जाँचका क्रममा दृष्टिमा समस्या देखिएका २० हजार तीन सय ८० बालबालिकालाई नि:शुल्क चस्मा वितरण गर्नाका साथै दुई सय एकजना बालबालिकाको आँखाको नि:शुल्क शल्यक्रियासमेत गरिएको जानकारी दिनुभयो ।
कार्यक्रम व्यवस्थापक शाहका अनुसार आँखा जाँच गरी वितरण गरिएको चस्मामध्ये ६३ प्रतिशत बालबालिकाले मात्र नियमित रूपमा चस्मा प्रयोग गरिरहेका छन् ।
‘चस्मा लगाउँदा साथीहरूले जिस्क्याउने, आमाबाबुले छोरीलाई विवाह गर्न कठिनाइ हुने भन्दै चस्मा लगाउन नदिने, चस्मा लगाउँदा सहजता नहुने र लजाउने जस्ता कारणहरूले पनि बालबालिकाहरूले नियमित रूपमा चस्मा नलगाएको देखिन्छ’ उहाँले भन्नुभयो ।
उहाँका अनुसार यसरी वितरण गरिएका चस्माको नियमित प्रयोगबाट ती विद्यार्थीहरूको शैक्षिकस्तरमा समेत उन्नति भएको छ । उनीहरूको दैनिकीमा समेत धेरै नै परिवर्तन आएको देखिएको छ ।
आरएम केडिया आँखा अस्पताल, सगरमाथा चौधरी आँखा अस्पताल, विराटनगर आँखा अस्पताल र मेची आँखा अस्पतालमार्फत् ती जिल्लामा कार्यक्रम सञ्चालन गरिएको थियो ।
सङ्घका कार्यकारी निर्देशक डा शैलेशकुमार मिश्रले सङ्घले कोही पनि नागरिकहरू पहुँच र पैसाको अभावमा आँखा उपचार सेवाबाट वञ्चित नहोउन् भन्ने उद्देश्यले विभिन्न दातृ निकायहरूसँगको सहकार्यमा देशैभरि विभिन्न नि:शुल्क शिविर आयोजना गरिरहेको जानकारी दिनुभयो ।
परियोजनाले कार्यक्रम सञ्चालित जिल्लाका महिला स्वास्थ्य स्वयम्सेविका, शिक्षक तथा विद्यायलका ‘भिजन एम्ब्यास्डर’ लाई आँखा जाँचसम्बन्धी आधारभूत तालिमसमेत प्रदान गरिएको थियो ।
