काठमाडौँ । नेपालमा पहिलोपटक मङ्किपक्स भाइरसको सङ्क्रमण देखिएको छ ।
स्वास्थ्य तथा जनसङ्ख्या मन्त्रालयका सहप्रवक्ता डा. समीरकुमार अधिकारीले २०८० असार १ गते विज्ञप्ति जारी गर्दै मङ्किपक्स भाइरस (एमपक्स) सङ्क्रमण देखिएको जानकारी दिनुभयो ।
‘एक ६० वर्षीय विदेशी महिलामा एमपक्ससँग मिल्दोजुल्दो लक्षण देखिएपछि काठमाडौँको अस्पतालमा परीक्षण भइरहेको थियो’ उहाँले जारी गर्नुभएको विज्ञप्तिमा भनिएको छ– ‘ती महिलाको शरीरबाट नमुना सङ्कलन गरी राष्ट्रिय जनस्वास्थ्य प्रयोगशाला टेकुमा परीक्षण गर्दा आज एमपक्स सङ्क्रमण पुष्टि भएको हो ।”
मङ्किपक्सको बारेमा थप खोज–अनुसन्धान तथा उपचार जारी रहेको जनाइएको छ । मङ्किपक्स विश्वभरि हाल १११ देशमा फैलिसकेको छ ।
मङ्किपक्स भाइरसबाट हुने एक किसिमको सरुवा रोग हो । यो एमपक्स रोग मानिसबाट मानिसमा वा जनावरबाट मानिसमा सर्ने गर्दछ । सन् १९८० मा बिफरको उन्मूलन र विश्वव्यापी बिफर खोपको अन्त्यपछि मङ्किपक्स मध्य, पूर्वी र पश्चिमा अफ्रिकामा निरन्तर देखापरिहेको छ ।
