भरतपुर । पशुचौपायामा देखिएको लम्पिस्किन रोगका कारण चितवनमा ८० गाईभैँसी मरेका छन् ।
भेटेरिनरी अस्पताल तथा पशु सेवा विज्ञ केन्द्र चितवनका कार्यालय प्रमुख सुशील केसीका अनुसार हाल जिल्लामा तीन हजार ८६ गाई र दुई सय ५२ भैँसी गरी तीन हजार चार सय १८ गाईभैँसीमा लम्पिस्किनको सङ्क्रमण देखिएको हो ।
सङ्क्रमण भएकामध्ये ८० गाईभैँसी मरेका छन् । सातओटै पालिकामा लम्पिस्किन फैलिएको, त्यसमध्ये राप्ती नगरपालिका र इच्छाकामना गाउँपालिका बढी प्रभावित भएको उहाँले जानकारी दिनुभयो ।
उहाँका अनुसार राप्ती नगरपालिकामा एक हजार ४०५, कालिका नगरपालिकामा दुई सय ६५, खैरहनी नगरपालिकामा २०४ गाईभैँसीमा सङ्क्रमण देखिएको छ । भरतपुर महानगरपालिकामा दुई सय २५, रत्ननगर नगरपालिकामा एक सय १४, इच्छाकामना गाउपालिकमा नौ सय ५२, माडी नगरपालिकामा दुई सय ५३ पशुलाई लम्पिस्किनको सङ्क्रमण देखिएको छ ।
कार्यालयका अनुसार इच्छाकामना गाउँपालिकामा ४९, भरतपुर महानगरपालिकामा १३, राप्ती नगरपालिकामा १०, कालिका र रत्ननगर नगरपालिकामा चार/चार गाईभैँसी लम्पिस्किनको सङ्क्रमणबाट मरेका छन् ।
झिँगा, भुसुना, लामखुट्टे विभिन्न किराको टोकाइबाट फैलिने यस रोगको सङ्क्रमणले पशुमा ज्वरो आउने, फोका निस्कने, गाँठागुठी आउने, पशुबस्तुलाई कमजोर बनाउने कार्यालयका पशुविकास अधिकृत डा. रामचन्द्र आचार्यले जानकारी दिनुभयो ।
रोग लागेका गाईभैँसीको समयमै उपचार र जैविक सुरक्षामा ध्यान दिएन भने गाईबस्तुमा गर्भपतनको समस्या पनि देखिनसक्ने उहाँको भनाइ छ । सङ्क्रमण फैलिन नदिन गोठ वरिपरि सफा गर्ने, जैविक सुरक्षामा ध्यान दिने, अन्य पशुसँग नराख्ने, चरनमा नलैजाने, पशुवस्तुको रोगसँग लड्ने क्षमता बढाउन खोप लगाउन उहाँले सुझाव दिनुभयो ।
यस रोगको रोकथामा र न्यूनीकरणका लागि पशु सेवा विज्ञ केन्द्र चितवनले सातओटै पालिकामा जैविक सुरक्षासम्बन्धी कार्यक्रम, औषधि वितरण, खोप वितरण गरिरहेको छ ।
