काठमाडौं । राष्ट्रिय जनमोर्चाका अध्यक्ष चित्रबहादुर केसीले नेपालको नागरिकता लिएर अब भारतीयले यहाँको शासन चलाउने बाटो खुलेको बताउनुभएको छ ।
नेपालमा ४७ लाख बढी अंगीकृत नागरिक रहेको भन्दै केसीले उनीहरुका सन्तानले वंशजको नागरिकता लिएर देश चलाउन खोजेको उहाँको आरोप थियो ।
‘अब नेपालमा अंगीकृतबाट जन्मेका लाखौं लाख भारतीयहरु नेपालको वंशजको नागरिक भए । यहाँ भारतको लागि समस्या के थियो ? बन्द व्यापार केही छेक्किएको थिएन, उद्योग धन्दा केही छेक्किएको थिएन ।
एउटै मात्र भारतमा समस्या के परेको थियो भने हाम्रो ७२ को संविधानमा प्रधानमन्त्री हुनको लागि राष्ट्रपति हुनको लागि सेनाको प्रधान सेनापति हुनको लागि सर्वोच्चको प्रधान न्यायधिस हुनको लागि वंशजको नागरिक मात्र हुन पाउँछ भनेर संविधानमा छ’ केसीले भन्नुभयो,‘त्ययसकारण भारतले वंशजको नेपाली नागरिक बनाएर नेपालको प्रधानमन्त्री, राष्ट्रपति, प्रधान सेनापति, प्रधानन्यायाधीश, सभामुख, मुख्यमन्त्री बनाउने योजना पुरा भयो ।’
भारतद्वारा नेपालको लुम्बिनी र कपिलवस्तुलाई समेत आफ्नो नक्सामा सामेल गरेर संसद भवनमा राख्ने कार्यको विरोधमा राष्ट्रिय जनमोर्चा काठमाडौंले बुधबार शान्तिवाटिकामा विरोध सभाको आयोजना गरेको हो ।
सो कार्यक्रमलाई सम्बोधन गर्दै अध्यक्ष केसीले भारतले आफ्ना नागरिकलाई नेपालको नागरिकता दिन पहिल्यैदेखि डिजाइन गरिरहेको र त्यो आज सफल भएको बताउनुभयो ।
‘नेपालको तीन तिरै खुला सिमाना छन् । भारतीयहरु नेपालमा आउँछन् र आइरहेका छन् । र उनीहरु यहाँ आएपछि उनीहरुका छोरा छोरी जन्मिनछन् । ४७ लाख अंगीकृत नागरिक छन् । उनीहरुलाई वंशजको नागरिकता दिनुपर्छ भनेर भारतले यो डिजाइन पहिले नै गरेको थियो’ केसीले भन्नुभयो ।
उहाँले संसदमा भएका राजनीतिक पार्टीहरु जहिले पनि लाखौं नेपालीले नागरिकता पाएनन् भनेर बोलिरहने गरेको स्मरण गर्नुभयो । भारतबाट विभिन्न रोजगार गर्न नेपाल आएकाहरु, बिबाह गरेर आएकाहरु अंगीकृत नागरिक भएको भन्दै उहाँले तिनिहरुबाट जन्मेकालाई वंशजको नागरिकता दिनुपर्छ भनेर लामो समयदेखि एउटा संघर्ष भैरहेको बताउनुभयो ।
‘पहिलेको दुवै सदनले अंगीकृत नागरिकता दिनुपर्छ भनेर पास गरिसकेका थिए । त्यसको पूर्व राष्ट्रपति विद्यादेवी भण्डारीले रोक्नु भएको थियो, रोकिएको थियो’ केसीले भन्नुभयो, ‘यसपालि रामचन्द्र पौडेलले आजै बिहान प्रचण्ड दिल्ली जानुअघि ४७ लाख अंगीकृतबाट जन्मेका भारतीय नागरिकलाई नेपालको वंशजको नागरिकता दिनु पर्छ भनेर त्यो प्रमाणीकरण गरे ।’
अध्यक्ष केसीले भारतले नेपालका धेरै भुभाग कब्जा गरेको छ भन्दै अहिले फेरि नयाँ बनेको संसदको भित्तामा नेपालको कपिलवस्तु र लुम्बिनीलाई राखेको बताउनुभयो । यसबारे धेरैले थाहा पाए पनि यो विषयमा कोही नबोलेको उहाँले बताउनुभयो ।
कार्यक्रमलाई नेकपा (मसाल) का प्रवक्ता राम प्रकश पुरी र अखिल नेपाल कानुन व्यवसायी संघ (अन्ला) का महासचिव लक्षणदेव पान्डेले सम्बोधन गनुृभएको थियो ।
भारत दक्षिण एशियामा शान्ति नहोस् भन्ने चाहन्छ : पुरी
कार्यक्रमको सञ्चालन नेकपा (मसाल) का काठमाडौं जिल्ला प्रवक्ता जगतप्रसाद रेग्मीले गर्नुभएको थियो । कार्यक्रममा विभिन्न जनवर्गीय संगठनका नेता तथा कार्यकताहरुको उपस्थिति रहेको थियो ।
डोटीमा विरोध सभा
त्यसैगरी राजमो डोटी जिल्ला समितिले पनि भारतीय हेपाहा प्रवृत्तिको विरोधमा सभा सम्पन्न गरेको छ ।
राजमो जिल्ला सचिव मानबहादुर खड्काको सञ्चालनबाट अघि बढेको कार्यक्रमलाई जिल्ला अध्यक्ष डबल बोगटी र उपाध्यक्ष महेश अवस्थीले सम्बोधन गर्नुभएको थियो ।
