प्युठान । राष्ट्रिय जनमोर्चाले सञ्चालन गरेको एक महिने संगठन निर्माण अभियान अन्तर्गत प्युठानका नौवटै पालिकामा सदस्यता अभियानलाई तिब्रता दिईएको छ । नौ वटै पालिकामा संगठन निर्माण पचिालन समिति गठन गरी जनभेट र सदस्यता वितरण जारी रहेको राजमो नेता आनन्द शर्माले जानकारी दिनुभएको छ ।
शुक्रबार ऐरावती गाउँपालिकाबाट जिल्लास्तरीय अभियानको उद्घाट गरिएको थियो भने पालिकाहरुबाट पनि बेग्लाबेग्लै टोली बनाएर एक महिने कार्यक्रमको सुरुवात गरिएको हो ।
नौवटा पालिकाहरुमध्ये मल्लरानी गाउँपालिकामा जिल्ला अध्यक्ष कृष्णबहादुर खड्काको नेतृत्वमा टोली परिचालन भएको छ भने प्युठान नगरपालिकामा जिल्ला सदस्य ध्रुब थापाले नेतृत्व गर्नुभएको छ । यस्तै, झिम्रुक गाउँपालिकामा गाउँपालिकाका अध्यक्ष तिलक जिसीले नेतृत्व गर्नुभएको छ । नौबहिनी गाउँपालिकामा जिल्ला सल्लाहकार राम पहाडीको नेतृत्वमा अभियान चलिरहेको छ ।
यसैगरी, ऐरावती गाउँपालिकामा जिल्ला समन्वय समिति प्युठानका प्रमुख केशव आचार्य, स्वर्गद्वारीमा जिल्ला उपाध्यक्ष इमानसिंह खड्का, गौमुखीमा नेकपा (मसाल) का जिल्ला प्रवक्ता ज्ञामुराम न्यौपाने, माण्डवीमा जनजाती सम्मेलनका केन्द्रीय सदस्य वीरबहादुर पुन र सरुमारानी गाउँपालिकामा नेता कुलदिप जिसीले अभियानको नेतृत्व गरिरहनुभएको छ ।
पालिका तहका अभियान परिचालन समिति अन्तर्गत वडाहरुमा पनि बेग्लाबेग्लै संगठन परिचालन समिति निर्माण भएका छन् । प्युठानमा घरदैलो अभियान, जनभेटघाट र सदस्यता वितरणलाई प्राथमिकताका साथ अघि बढाइएको छ ।
नेता शर्माको आग्रहः देश बलियो बनाउन राजमोलाई साथ दिनुहोस्
