शंकरप्रसाद पोख्रेल, बुटवल ।
राष्ट्रिय जनमोर्चाकी उपाध्यक्ष एवम् अखिल नेपाल महिला संघकी पूर्वअध्यक्ष दुर्गा पौडेलले अनेमसंघको दबाबका कारण सम्पत्तिमा महिलालाई समान हक दिलाउने कानुन बनेको बताउनुभएको छ ।
अखिल नेपाल महिला संघको बुटवलमा सुरु भएको राष्ट्रिय परिषद बैठकको उद्घाटन गर्दै संघका सल्लाहकार पौडेलले आफूहरुको आन्दोलन र दबाबले सम्पत्तिमा महिलालाई समान हक दिने कानुन बनेपनि व्यवहारमा भने आउन नसकेको उल्लेख गर्नुभयो ।
पौडेलले भन्नुभयो, ‘महिलाहरूको समान अधिकारको लागि आवाज उठाउने संगठन भनेको हाम्रो महिला संगठन हो । विश्वमै महिला अधिकारको लागि त्यसरी रोष्टम घेराउ गरेर महिला अधिकारको लागि नारा लाउने संगठन यही नै होला । हाम्रो महिला संगठनले त्यत्रो आन्दोलन गर्यो, प्रशिक्षण चलाएयो, विज्ञहरुसँग अन्तरक्रिया कार्यक्रम गर्यो। विश्वभर छरिएर रहेका महिलाहरुलाई संगठित गर्दै गयो । त्यसरी आन्दोलन गरेको कारणले आज महिलाहरूलाई सम्पत्तिमा समान अधिकार विधेयक बन्यो र त्यो विधेक पास भयो ।’
उहाँले थप्नुभयो, ‘प्रजननमा महिला अधिकार, सम्बन्ध विच्छेदमा महिला अधिकार लगायत थुप्रै महिलाहरूको नैसर्गिक अधिकारको विषयमा हामीहरुले आन्दोलन गरेका थियौं र त्यो सफल भएको छ ।’
पौडेलले पुँजीवादले महिलाहरुलाई अहिले पनि बजारमा पाउने वस्तु जस्तै उपयोग गरिरहेको बताउनु भयो ।
कार्यक्रमलाई सम्बोधन गर्दै नेकपा (मसाल) का प्रवक्ता रामप्रकाश पुरीले देशमा अमिरिकी साम्राज्यवाद सिधै आएकोले अबको लडाइँ उस्का विरुद्ध केन्द्रित गर्नुपर्ने बेला भएको बताउनुभयो ।
यस्तै, वामपन्थी नेता आनन्द शर्माले नेपाली जनताले लामो समय संघर्ष गरेर प्राप्त गरेका महत्वपूर्ण उपलब्धिहरु गणतन्त्र, धर्मनिरपेक्षता, समानुपातिक समावेशी जस्ता महत्वपूर्ण उपलब्धिहरु प्रतिगामी शक्तिहरु सल्बलाइरहेको बताउनु भयो ।
उहाँले गत मंसिर ४ गतेको चुनावमा प्रतिगामी शक्तिहरुले आफ्नो स्थिति अलि सुदृढ गरेको देखिएको बताउनुभयो ।
यतिमात्रै नभएर भारतीय साम्राज्यवाद हाम्रो देशमा कायम भएको गणतन्त्र, धर्मनिरपेक्षता त्यसलाई उल्ट्याउन चाहेको र त्यसकोलागि उनीहरुले काम गरिरहेको बताउनुभयो ।
कार्यक्रममा वामपन्थी नेता सुरेस थापा, अखिल नेपाल युवक संघका अध्यक्ष कृष्णराज पाण्डे, अखिल (छैठौं) का केन्द्रीय सदस्य सागर बेलबासे, अखिल नेपाल बुद्धिजीवि संघका सचिवालय सदस्य दुर्गानाथ खरेल, कम्युनिष्ट संग्रहालयका अध्यक्ष चेतनाथ आचार्य लगायतले शुभकामना दिनुभएको थियो ।
अध्यक्ष मिना पुनको अध्यक्षतामा भएको कार्यक्रमको सञ्चालन महासचिव सकुन्तला राना र स्वागत पदमा पण्डितले गर्नुभएको थियो ।
