पुष्कर भट्ट, कञ्चनपुर ।
एमसीसी र सीमा अतिक्रमण विरुद्ध देशब्यापी विरोध सभा अन्तर्गत कञ्चनपुरमा पनि नौ राजनीतिक दल तथा संगठनले विरोध प्रदर्शन गरेका छन् । शनिबार महेन्द्रनगरमा जुलुश प्रदर्शनसहित स्थानीय मदनचोकमा विरोध सभा गरिएको हो ।
सभालाई सम्बोधन गर्दै राष्ट्रिय जनमोर्चाका केन्द्रीय सदस्य एवं सुदूरपश्चिम इन्चार्ज मनोज भट्टले विदेशी सहयोग भित्र्याउने नाममा एमसीसी सम्झौता गरेर सिंहदरबारमा रमाउनेहरु कम्युनिष्ट हुनै नसक्ने जिकिर गर्नुभयो । उहाँले अहिलेका सत्ताधारी र प्रमुख विपक्षी दलले देशलाई अमेरिकी सम्राज्यवादी कित्तामा धकेल्न प्रयास गरिरहेको बताउनुभयो ।
फरक प्रशंगमा नेता भट्टले कालापानीलगायतका क्षेत्रबाट तत्काल भारीय सेना हटाउन र सबै ठाउँको अतिक्रमित भूमि फिर्ता गर्न माग गर्नुभयो । भारतीय साम्राज्यवादले नेपाली भूमि अतिक्रमण जारी राखे तीन करोड जनता चुप लागेर नबस्ने उहाँले चेतावनी दिनुभयो ।
कार्यक्रमलाई नेकपा (मसाल) का जिल्ला प्रवक्ता लक्ष्मी दत्त बडु, नेकपा (क्रान्तिकारी माओवादी) का बिष्णु नेपाली र हरि सुवेदीले पनि सम्बोधन गर्नुभएको थियो ।
राष्ट्रिय जनमोर्चा कञ्चनपुरका अध्यक्ष रामबहादुर कार्कीको स्वागत मन्तव्यसँगै सुरु भएको विरोध सभाको सञ्चालन क्रान्तिकारी माओवादीका राम महरा र अध्यक्षता राजमो जिल्ला सहसचिव लाल बहादुर कुवँरले गर्नुभएको थियो ।
