धनगढी । नेकपा (मसाल) सहित नौ राजनीतिक दलले सीमा अतिक्रमण र एमसीसी विरुद्ध देशब्यापीरुपमा आयोजना गरेको विरोध प्रदर्शन कैलालीमा भव्यतापूर्वक सम्पन्न गरिएको छ ।
शनिबार नौ राजनीतिक दल तथा संगठनले अत्तरियामा विरोध प्रदर्शनसहित सभाको आयोजना गरेका थिए । सभा सुरु हुनु अघि नारा जुलुशसहित अत्तरिया बजार परिक्रमा गरिएको थियो ।
सभालाई सम्बोधन गर्दै राष्ट्रिय जनमोर्चाका केन्द्रीय सदस्य एवं सुदूरपश्चिम प्रदेश अध्यक्ष नन्दराज भट्टले अमेरिकाले नेपाललाई आर्थिक सहयोगको नाममा एमसीसीमार्फत अमेरिकी सेनाको अखडा बनाउन खोजेको बताउनुभयो । उहाँले कालापानी लगायतका क्षेत्र अतिक्रमण गरेर भारतीय साम्राज्यवादले नेपालमाथि नांगो नाच नाचिरहेको तर सत्तारुढ दल र सरकार उसैसँग लम्पसरा परेको आरोप पनि लगाउनुभयो ।
राजमो कैलालीका सचिव जगत प्रसाद जोशीको अध्यक्षता तथा नेकपा (क्रान्तकारी माओवादी) कैलाली सेक्रेटरी रुद्र कडेलको सञ्चालनमा भएको विरोध सभालाई क्रान्तिकारी माओवादीका केन्द्रीय सदस्य रामबहादुर केसी, नेकपा (माले) का केन्द्रीय सदस्य परेक रावल, नेकपा माओवादी केन्द्रका केन्द्रीयस सदस्य रत्न बिकलगायत नेताहरुले सम्बोधन गर्नुभएको थियो । कार्यक्रममा ने कपा (माले) का बिन्दु महरले स्वागत गर्नुभएको थियो ।
