बुटवल । अखिल नेपाल महिला संघको सातौं राष्ट्रिय सम्मेलन बुटवलमा सुरु भएको छ । सम्मेलनको उद्घाटन राष्ट्रिय जनमोर्चाका अध्यक्ष चित्रबहादुर केसीले केहीबेरमा गर्नु हुनेछ ।
सम्मेलनमा सहभागी हुन ५० भन्दा बढी जिल्लाबाट प्रतिनिधि पर्यवेक्षकहरु बुटवल आइपुगेको र कैयौं जिल्लाबाट आउने क्रममा रहेको अध्यक्ष मिना पुनले जानकारी दिनुभयो ।
नयाँ बसपार्कबाट हजारौंको जुलुशले अमरपथ–जेसिसपथ हुँदै बुटवल बजार परिक्रमा गरी ट्राफिक चोकमा कार्यक्रमको उद्घाटन समारोह हुँदैछ । सम्मेलनलाई नेकपा (मसाल) का प्रवक्ता रामप्रकाश पुरी, राष्ट्रिय जनमोर्चाका उपाध्यक्ष एवं प्रवक्ता सांसद दुर्गा पौडेल, प्रदेश सभाका सांसदहरु तारा जिसी, पियारी थापा लगायत सबै जनवर्गीय संगठनका नेताहरुले शुभकामना दिने कार्यक्रम छ ।
कार्यक्रमको बन्द सत्र भने राष्ट्रिय जनमोर्चाको क्षेत्रीय कार्यालयस्थित सभाहलमा हुनेछ । बन्दसत्रमा ४०० बढी प्रतिनिधि पर्यवेक्षक सहभागी हुने अध्यक्ष पुनले जानकारी दिनुभयो ।
सम्मेलनले राजनीतिक, सांगठनिक तथा विशेष प्रस्तावहरु पारित गर्नेछ । महिला हिंसा विरुद्ध अभियान सञ्चालन गर्न कार्यक्रम तय गर्दै नयाँ नेतृत्व पनि चयन गर्ने महिला संघले जनाएको छ ।
