काठमाडौँ । नेपालमा इसिम (इम्बेडेड सब्सक्राइबर आइडेन्टिटी मोड्युल) प्रयोगकर्ताको सङ्ख्या २९ हजार नाघेको छ । नेपाल टेलिकमका प्रवक्ता शोभन अधिकारीले गत भदौ ३१ देखि हालसम्म २९ हजारभन्दा बढी वितरण भइसकेको जानकारी दिनुभयो ।

नेपाल टेलिकमले सुरुमा सुन्धारा काउन्टरबाट इसिम वितरण गरेको थियो । साथै गत असोज ४ देखि भने नक्साल, चावहिल, ठिमी, भक्तपुर, पाटन, गोङ्गबु, छाउनी र पुल्चोक ग्राहक सेवा केन्द्रबाट वितरण सुरु गरेको थियो । मङ्सिर ८ गतेदेखि भने देशभर इसिम उपलब्ध गराइएको हो ।

‘नेपाल टेलिकमका पुराना ग्राहकले इसिम लिन चाहेमा नि:शुल्क प्राप्त गर्न सक्छन् । पोस्टपेडको नयाँ इसिम लिन चाहनेले अहिले बिक्री भइरहेकै मूल्यमा लिन सक्छन्’ प्रवक्ता अधिकारीले भन्नुभयो– “इसिममा ग्राहकले आफ्नो उपकरणअनुसार बढीमा २० ओटासम्म नेटवर्कमा जोड्न सक्छन्’ तर एकपटक भने एउटा नेटवर्कमा मात्रै जोड्न सकिने उहाँको भनाइ छ ।

के हो इसिम ?
इसिम इलेक्ट्रिक सिम हो, जुन मोबाइल डिभाइस तथा डिजिटल डिभाइसमै इम्बेड गर्न सकिन्छ । मोबाइल सेटबाहेक इसिमलाई अन्य डिभाइस तथा स्मार्ट वाच र शरीरमा पहिरिनयोग्य विभिन्न प्रकारका डिभाइसमा पनि प्रयोग गर्न सकिन्छ । इसिम उपलब्ध भएपछि भौतिक रूपमा प्रयोग गरिने सिमकार्डको आवश्यकता रहँदैन ।

इसिम प्रयोग गर्न मोबाइल सेटमा इसिम इन्स्टल गर्नका लागि क्युआर कोडमार्फत स्क्यान गर्नुपर्छ । क्युआर कोडको सुविधा भएका पछिल्लो पुस्ताका मोबाइल सेटमा मात्र इसिम प्रयोग गर्न सकिन्छ ।
सिमकार्डमा प्रयोग हुने स्टोरेज, मेमोरी मोबाइल डिभाइसमा हुन्छ । ग्राहककर्ताले प्रयोग गर्ने मोबाइलमा भएको विशेषताअनुसार र ग्राहकले लिन चाहने सेवासँग इसिम जोडिन्छ । इसिम इम्बेड हुनाले सिमकार्ड जस्तो हराउने, भाँचिने हुँदैन ।

यस्तो सुविधा यदि कुनै व्यक्ति विदेशमा गएको खण्डमा विदेशको नेटवर्क सेवा लिएर पुरानो नेटवर्क पनि राख्न सकिन्छ । त्यसलाई मोबाइलबाट हटाउन वा सिम निकाल्नुपर्ने झन्झट हुँदैन । विदेशमा उतैको इसिम लिएर सहजै विदेशी नेटवर्कसँग जोडिन सकिन्छ ।

सिमकार्ड प्रयोगमा रहँदा मोबाइल हराएको खण्डमा पुन: पहिले लिएको सिमको प्रक्रियाअनुसार प्राप्त गर्न सकिन्छ भने इसिम प्रयोगकर्ताको सुविधालाई मध्यनजर गर्दै मोबाइल हराएको खण्डमा हालसम्म दुई/तीन पटकसम्म क्युआर स्क्यान गरी सोही सिम लिन सकिन्छ, जुन स्कानर ग्राहकले इसिम लिँदा नै प्राप्त गर्ने व्यवस्था हुन्छ । त्यसको सुरक्षा ग्राहक स्वंयमले नै गर्नुपर्छ ।

इसिम सपोर्ट गर्ने जुनसुकै ग्राहकले इसिम प्राप्त गर्न सक्ने व्यवस्था छ । सिमकार्डको प्राप्तिका लागि चाहिने कागजात र शुल्क इसिम प्राप्त गर्नका लागि पनि एउटै व्यवस्था छ । सिमकार्डमा भएको सबै सेवा इसिममा पनि रहने र इसिममा थप सुविधा रहन्छ ।
इसिममार्फत एउटा फोनबाट अर्को फोनबाट डाटा सार्न, इसिममा उपलब्ध डाटालाई आवश्यकताअनुसार परिवर्तन गर्नसमेत सकिन्छ ।

मोबाइलले इसिम सपोर्ट गर्छ भने जुन अपरेटरको सेवा लिन मन छ, ग्राहककोमा आफ्नो केवाइसी अद्यावधिक गराएर सिम प्रोफाइल अपडेट गराए मात्र पुग्ने टेलिकमले जनाएको छ । (रासस)