दाङ । दाङमा डायलायसिसको समस्या देखिएको छ । राप्ती प्रादेशिक अस्पतालमा पाँचओटा मात्र डायलायसिस मेसिन चालु अवस्थामा भए पनि त्यसले २३ जनालाई मात्रै सेवा दिन सक्दा यस्तो समस्या देखिएको हो ।
स्वास्थ्य तथा जनसङ्ख्या मन्त्रालयले केही दिनअघि मात्रै आठओटा मेसिन पठाएको छ तर त्यो जडान हुनसकेको छैन । त्यसले गर्दा धेरै मिर्गौलापीडितले आफ्नो पायक पर्ने ठाउँबाट सेवा लिन पाएका छैनन् ।
जडान भएपछि ६० जनासम्मलाई सेवा दिन सकिने अस्पतालका डायलायसिस प्रमुख लीना बडेलले बताउनुभयो ।
‘अहिले हामीसँग पाँचओटा मात्रै मेसिन चलिरहेका छन्, त्यसबाट २३ जनालाई मात्रै सेवा दिन सकिएको छ’ उहाँले भन्नुभयो– ‘अब थप आएका आठओटा मेसिन जडान भएपछि ६० जनालाई सेवा दिन सकिन्छ ।’ अहिले प्रादेशिक अस्पतालमा ८० बिरामी पालो कुरिरहेका छन् ।
कर्मचारीको पनि त्यत्तिकै समस्या हुने गरेको उहाँले बताउनुभयो । अहिले चार स्टाफ नर्स मात्रै भएकाले यसमा थप हुनुपर्ने बताउनुभयो ।
राप्ती स्वास्थ्य विज्ञान प्रतिष्ठानमा पनि अहिले पाँचओटा बेड मात्रै छन् । त्यसबाट २५ जनालाई सेवा दिन सकिएको छ ।
मन्त्रालयले केही दिनअघि मात्रै १० ओटा डाययलायसिस मेसिन पठाएकाले त्यो जडान भएपछि भने सहज हुने प्रतिष्ठानका सूचना अधिकारी निशानदाजु भट्टराईले बताउनुभयो । उहाँका अनुसार अहिले ४० जनासम्म डायलायसिसको प्रतिक्षामा रहेको भन्दै नयाँ आएका मेसिन जडान भएपछि भने सबैले सहज सेवा पाउने उहाँको भनाइ छ ।
डायलायसिस मसिनको व्यवस्था नहुँदा दाङका मात्रै होइन, रुकुम, रोल्पा, सल्यानलगायत छिमेकी जिल्लाका बिरामी समस्यामा परेका छन् । दाङकै लमहीमा पनि अहिले करिब ८० जना डायलाइसिसको प्रतिक्षामा छन् । अहिले २४ जनाको डायलायसिस गरिएको छ ।
ठाउँ पनि आवश्यक पर्ने भएकाले थप मेसिन ल्याउन नसकिएको चिकित्सक डा अबदुस बुथ खानले बताउनुभयो । लमहीमा रोटरी क्लब अफ लमही र गौतमबुद्ध मुटुरोग अस्पतालले उक्त डायलायसिस सेन्टर सञ्चालनमा ल्याएका हुन् । (रासस)
