काठमाडौँ । कोरोना भाइरसको संक्रमण आज दुई सय ३० जनामा देखिएको छ ।
स्वास्थ्य तथा जनसङ्ख्या मन्त्रालयले आज गरेको नियमित पत्रकार सम्मेलनमा मन्त्रालयका प्रवक्ता डा. सञ्जयकुमार ठाकुरले तीन हजार आठ सय ३६ परीक्षणमध्ये दुई सय ३० जनामा कोरोना भाइरसको संक्रमण पुष्टि भएको जानकारी दिनुभयो ।
उहाँका अनुसार आज ७८ जना कोरोना भाइरसबाट स्वास्थ्य लाभ लिई घर फर्किएका छन् । निको हुने प्रतिशत ९८.६ प्रतिशत रहेको छ ।
उपत्यकामा ४९ जना
यस्तै काठमाडौँ उपत्यकामा ४९ जनामा संक्रमण पुष्टि भएको छ । उहाँले ललितपुरमा तीन, भक्तपुरमा चार र काठमाडौँमा ४२ जनामा सङ्क्रमण भएको मन्त्रालयका बताउनुभयो ।
उहाँले सक्रिय संक्रमितको सङ्ख्या दुई हजार पाँच सय पाँच पुगेको जानकारी दिनुभयो ।
यस्तै आज कोरोना भाइरसको संक्रमणबाट दुई जनाको निधन भएको छ, भने पाँच सयभन्दा बढी संक्रमित भएको जिल्ला काठमाडौँ र दुई सयभन्दा बढी सङ्क्रमित भएको जिल्ला ललितपुर रहेको छ । संक्रमित शून्य भएका जिल्ला मनाङ, मुस्ताङ, हुम्ला, डोल्पा, जुम्ला, मुगु र बझाङ रहेका छन् ।
यस्तै होम आइसोलेसनमा दुई हजार तीन सय ८०, संस्थागत आइसोलेसनमा एक सय २५, सघन उपचार कक्ष (आइसियु) मा ३२ र भेन्टिलेटरमा तीन जनाको उपचार भइरहेको छ ।
आज कोरोना भाइरसविरुद्धको खोप एक लाख ६५ हजार दुई सय छ जनाले लगाएका छन् ।
