काठमाडौं । कोरोना भाइरसबाट सोमबार ६५८ जना संक्रमित भएका छन् । स्वास्थ्य तथा जनसंख्या मन्त्रालयले जारी गरेको नियमित बुलेटिनमा छ हजार ६४३ परीक्षणमध्ये सो संख्यामा कोरोना भाइरसको संक्रमण पुष्टि भएको हो ।
पछिल्लो २४ घण्टामा सक्रिय संक्रमितको संख्या चार हजार २९६ पुगेको छ । आज कोरोना भाइरसबाट स्वास्थ्य लाभ लिई ४५६ जना घर फर्किएका छन् । यस अवधिमा कोरोना भाइरसको संक्रमणबाट एक जनाको निधन भएको छ । अहिलेसम्म ११ हजार ९९३ जनाको कोरोना भाइरस संक्रमणबाट निधन भइसकेको छ ।
पाँच सयभन्दा बढी संक्रमित भएका जिल्ला काठमाडौं र ललितपुर तथा संक्रमित शून्य भएका जिल्ला मनाङ, मुस्ताङ, कालिकोट, मुगु र डोल्पा रहेका छन् ।
हाल होम आइसोलेसनमा चार हजार १३४, संस्थागत आइसोलेसनमा १६२, सघन उपचार कक्ष (आइसियु)मा ५० र भेन्टिलेटरमा एक जनाको उपचार भइरहेको छ । विगत २४ घण्टामा ३८ हजार १५ जनाले कोरोना भाइरस विरुद्धको खोप लगाएका छन् ।
