टेकराज भुसाल (टेकु),बुटवल ।
बुटवल उद्योग बाणिज्य संघ को आयोजनामा लगानी लुम्बिनीमा, समृद्धि देशमा’ भन्ने मुल नाराका साथ बुटवलमा औद्योगिक व्यापार मेला सुरु भएको छ । औधोगिक मेलाको उद्घाटन नेपाली कांग्रेसका प्रमुख सचेतक तथा पपूर्व रक्षामन्त्री बालकृष्ण खाँणले गरे । उद्घाटन गर्दै नेता खाणले सरकारले लगानी कर्तालाई ढुक्क भएर लगानी गर्ने वातावरण बनाउन आग्रह गर्दै व्यवासायीहरुको लगानी सुरक्षाको सुनिश्चितता हुनुपर्नेमा जोडमा जोड दिए । बुटवल उद्योग वाणिज्य संघका अध्यक्ष खिमबहादुर हमालले प्रदेश ५ मा लगानीका प्रयाप्त सम्भावना भएपनि लगानीको वातावरण अझै बन्न नसकेको बताए ।
मेलामा आर्मी गरुड दल गण रामनगरद्वारा न्याउली बाजा सहित सराय नाच, नेवाः पुचः गुठी बुटवल देवीनगरको झाकी तथा लाखे नाच, थारु संस्कृतिको मयुर नाच, भिन्सहरा सामाजिक संस्था, मनकामना देवसिद्ध राधाकृष्ण मन्दिर समितिद्वारा सांस्कृतिक झाँकी प्रस्तुत गरिएको थियो । झाँकीमा उत्कृष्ट हुने समूहलाई मेला समापनमा पुरस्कृत गरिने महासचिव दिनेशप्रसाद श्रेष्ठले जानकारी दिए ।
पुस २३ गतेसम्म सञ्चालन गरिने मेलामा करिब ५ सय स्टल राखिएका छन् । मेलामा ५ लाख बढी दर्शक भित्र्याईने र मेला भित्र १५ करोड बढीको कारोबार हुने आँकलन गरिएको मेला कार्यसम्पादन समितिका सहसंयोजक उज्जवल कसजुले बताए ।
कार्यक्रममा नेपाल उद्योग बाणिज्य महासंघका उपाध्यक्ष किशोर प्रधान, चन्द्र ढकाल, प्रदेशसभा सदस्य भोजप्रसाद श्रेष्ठ, पुष्पा चौधरी, प्रदेश योजना आयोगका उपाध्यक्ष डा. ईश्वर गौतम, बुटवल उपमहानगरपालिकाका प्रमुख शिवराज सुवेदीलगायतले मेला सफलताको शुभकामना व्यक्त गरेका थिए ।
