काठमाडौं । देशभर पछिल्लो २४ घण्टामा थप ३४७ जनामा कोरोना भाइरस संक्रमण पुष्टि भएको छ भने दुई जनाको संक्रमणका कारण मृत्यु भएको छ ।
पछिल्लो २४ घण्टामा तीन हजार ८८८ जनाको नमूना परीक्षण गरिएको थियो । दुई हजार ३६० जनाले पीसीआर र एक हजार ५२८ जनाको एन्टिजेन विधिबाट परीक्षण गरिएको स्वास्थ्य तथा जनसंख्या मन्त्रालयले जनाएको छ ।
सो अवधिमा ९५ जना कोरोना भाइरसबाट संक्रमणमुक्त भएका छन् । यससँगै संक्रमण मुक्त हुनेको संख्या नौ लाख ६८ हजार ४८९ पुगेको छ । संक्रमणमुक्त हुने दर ९८ दशमलव पाँच प्रतिशत रहेको मन्त्रालयले जनाएको छ ।
पछिल्लो २४ घण्टामा ७८ हजार २२८ जनाले कोभिडविरुद्धको खोप लगाएका छन् । हाल सक्रिय संक्रमितको संख्या तीन हजार १७७ रहेको छ । अहिलेसम्म कोरोनाबाट मृत्यु हुनेको संख्या ११ हजार ९५६ पुगेको छ । होम आइसोलेशनमा तीन हजार ३५, संस्थागत आइसोलेशनमा १४२, आईसीयू २२ र भेन्टिलेटरमा दुई जना संक्रमित रहेका छन् ।
हाल ५०० बढी सक्रिय संक्रमित भएका जिल्लामा काठमाडौँ, २०० भन्दा बढी सक्रिय संक्रमित रहेका जिल्लाहरुमा ललितपुर र मोरङ रहेका छन् । शून्य संक्रमित रहेका जिल्लाहरूमा मनाङ, मुस्ताङ, जाजरकोट, कालीकोट, मुगु, हुम्ला, बाजुरा र डढेलधुरा छन् । उपत्यकाका तीन जिल्लामध्ये हाल काठमाडौँमा एक हजार ७६३, ललितपुर ३१३ र भक्तपुरमा ८९ सक्रिय संक्रमित रहेको मन्त्रालयले जनाएको छ । कूल संक्रमण दर १७ प्रतिशत रहेको छ । प्रति १० लाख जनसंख्यामा मृत्युदर ४०९ दशमलव पाँच रहेको छ ।(रासस)
