जनकपुरधाम । धनुषामा एक नवविवाहित युवतीको शंकास्पद मृत्यु भएको छ । धनुषाको क्षिरेश्वरनाथ नगरपालिका ५ महेन्द्रगरकी बस्ने नविनकिशोर साहकी १९ वर्षीया श्रीमती ज्योती नायक (साह) बिहीबार मृत भेटिएकी हुन् । १७ लाख दाइजो दिएर गत वर्ष विवाह गरेकी छोरीलाई फ्रिज नदिएको निहुँमा हत्या गरिएको माइतीपक्षले आरोप लगाएको छ ।
ज्योतीको शवलाई पोस्टमार्टमको लागि प्रादेशिक अस्पताल जनकपुरमा राखिएको र शवको प्रकृति हेर्दा शंकास्पद देखिएको प्रहरीले जनाएको छ । पोष्टमार्टम पछि मात्रै हत्या वा आत्महत्याबारे भन्न सकिने प्रहरीले जनाएको छ ।
ज्योतीको करिब एकवर्ष अघि २०७५ फागुन १९ गते नविन किशोरसँग विवाह भएको थियो । ज्योतीका पति नविन किशोर स्थानीय एक सामुदायिक विद्यालयमा र ससुरा राजकिशोर रामेछापमा सामुदायिक विद्यालयकै शिक्षक रहेका छन् ।
माइतीपक्षले भने छोरीको हत्या भएको भन्दै मृतकका पति विरुद्ध किटानी जाहेरी दिएको छ । बुबा सुरेन्द्र नायकले ईलाका प्रहरी कार्यालय सखुवा महेन्द्रनगरमा किटानी जाहेरी दिएका हुन् । छोरीलाई दाइजोको निहुँमा पटक पटक यातना दिएकाले परिवारकै सदस्यले हत्या गरेको उनको ठहर छ ।
यसअघि मंसिर ६ गते धनुषाको मिथिला बिहारी नगरपालिका–३ स्थित मिथिलेश्वरकी २२ वर्षीया कुसुम मण्डलको पनि दाइजोको निहुँमा हत्या भएको थियो ।
