काठमाडौं । अखिल नेपाल राष्ट्रिय स्वतन्त्र विद्यार्थी युनियन (छैठौं)ले आइतबार कोहलपुरमा प्रहरीले निर्मम दमन गरेको भन्दै आपत्ति प्रकट गरेको छ । ट्रकले एक विद्यार्थीलाई ठक्करदिएपछि भएको प्रदर्शनमा प्रहरीले अनावश्यक बल प्रयोग गरेको भन्दै छैठौंले दोषी प्रहरी अधिकारीमाथि कारबाहीको माग गरेको छ ।
अखिल (छैठौं) का अध्यक्ष विमल पोखरेलले एक वक्तव्य प्रकासित गरी विगतदेखि नै टिपर र ट्रकको दादागिरी बढेको र उनीहरुमाथि कारबाही नहुँदा दादागिरीले सीमा नाघेको बताउनुभएको छ ।
त्रिभुवन माध्यमिक विद्यालय कोहलपुरमा कक्षा ७ मा अध्ययनरत बालिका प्रकृति चन्दलाई ट्रकले ठक्कर दिएपछि तनाव उत्पन्न भएको थियो । त्यसक्रममा भएको प्रहरी दमनबाट १२ जना भन्दा बढी घाइते भएका छन् भने स्थिति नियन्त्रणमा लिन स्थानीइ प्रशासनले दिउँसो तीन बजेदेखि निशेधाज्ञा जारी गरेको छ ।
अध्यक्ष पोखरेलद्वारा जारी वक्तव्यमा भनिएको छ, ‘बाँकेको कोहलपुरमा ट्रकको ठक्करबाट कक्षा ७ मा पढ्ने बालिका गम्भीर घाइते भएपछि भएको विरोध प्रदर्शनमा प्रहरीले अमानवीय दमन गरेको छ । विद्यालय उमेरका विद्यार्थीमाथि गरिएको दमनप्रति निन्दा एवं भर्त्सना गर्दै विद्यार्थीमाथि दमन गर्ने प्रहरी अधिकारीलाई कारवाहीको माग गर्दछौं ।
नेपालमा टिपर र ट्रकको दादागिरीले सीमा नाघेको छ । पहिलेका घटनाका दोषीलाई कारवाही नगरेका कारण लापरबाही र दादागिरीका घटना झनै बढेर गएका छन् । कोहलपुर घटनाको छानबिन गर्न, घाइतेको निशुल्क उपचार र क्षतिपूर्तिको लागि माग गर्दछौं ।’
