धनगढी । राष्ट्रिय जनमोर्चाले कालापानीलगायत क्षेत्रमा भारतले गरेको सीमा अतिक्रमण विरुद्ध ‘कालापानी मार्च’ सुरु गरेको छ । धनगढीमा विशेष कार्यक्रम गरी मार्च सुरु गरिएको राजमो सुदूरपश्चिम प्रदेश समितिका अध्यक्ष नन्दराज भट्टले जानकारी दिनुभयो ।
राष्ट्रिय जनमोर्चाका केन्द्रीय सदस्य एवं सुदूरपश्चिम इन्चार्ज मनोज भट्टले प्रदेश अध्यक्ष नन्दराज भट्टलाई पार्टीको झण्डा हस्तान्तरण गरी कार्यक्रमको उद्घाटन गर्नुभएको छ । सो अवसरमा बोल्दै नेता भट्टले अहिले सीमा अतिक्रमण विरुद्ध राष्ट्रिय एकता कायम भएकोले अतिक्रमण हटाउन उपयुक्त मौका आएको बताउनुभयो ।
केन्द्रीय सदस्य भट्टले कालापानीबाट भारतीय सेना फिर्ता गर्न र भारतले अतिक्रमण गरेको भूभाग तत्काल फिर्ता गर्न सरकारलाई ढिला नगरी पहल चाल्न पनि सुझाव दिनुभयो । उहाँले दार्चुला लगायत देशभर अतिक्रमित भूमिबारे चर्चा गर्दै ति सबै क्षेत्र खाली गराउन जनताको ऐक्यवद्धता र दबाव आवश्यक रहेको पनि बताउनुभयो ।
नन्दराज भट्टको अध्यक्षतामा भएको उद्घाटन समारोहको सञ्चालन राजमोका केन्द्रीय सदस्य लोकेन्द्र लम्साल तथा स्वागत अखिल नेपाल किसान संघका केन्द्रीय सदस्य हरिकृष्ण पाण्डेयले गर्नुभएको थियो । कार्यक्रममा तराई मधेश जनवादी मोर्चाका महासचिव राजाराम चौधरी, अखिल (छैठौं) का केन्द्रीय सदस्य उमेश कँडेल र नेपाली कांग्रेसका नेता हरि रेग्मीले शुभकामना दिनुभएको थियो ।
यस्तै, युएई नेपाली एकता समाजका सभापति जय बहादु, बिकले पनि कार्यक्रम प्रति ऐक्यवद्धता जनाउनुभएको राजमो सुदूरपश्चिम प्रदेश समितिले जनाएको छ ।
राजमोले आजबाट सुरु गरेको मोटरसाइकल र्याली सुदूरपश्चिमका विभिन्न पहाडी जिल्ला हुँदै दार्चुला पुग्नेछ भने १७ गते कञ्चनपुर सदरमुकाम महेन्द्रनगरमा समापन हुनेछ । समापन कार्यक्रममा राजमो अध्यक्ष चित्रबहादुर केसीले सम्बोधन गर्नुहुने राजमो सुदूरपश्चिम प्रदेश समितिले जनाएको छ ।
धनगढीबाट सुरु भएको मोटरसाइकल र्याली आज अत्तरिया, बुडरलगायतका स्थामा कोणसभा गरी डडेल्धुरा बास हुनेछ भने भोलि डडेल्धुराका कार्यक्रम गरी गोकुलेश्वरका लागि अघि बढ्ने कार्यक्रम छ ।
यस्तो छ, कार्यक्रमको रुपरेखा
१- २०७६ मंसिर ७ गते विहान ८ बजे धनगढी पत्रकार सम्मेलन
२- २०७६ मंसिर ११ गते विहन १० बजे धनगढी एलएन चौक कालापानी अभियानको उद्घाटन
३- २०७६ मंसिर ११ गते दिउँसो १ बजे अत्तरिया चौक र्याली तथा सभा
४- २०७६ मंसिर ११ गते दिउसो ४ बजे डोटी, बुडर बजार र्याली तथा सभा
५- २०७६ मंसिर १२ गते विहान ८ बजे डडेल्धुरा बसपार्क र्याली तथा सभा
६- २०७६ मंसिर १२ गते दिउँसो १ बजे बैतडी पाटन र्याली तथा सभा
७- २०७६ मंसिर १३ गते दिउँसो १ बजे दार्चुला खलंगा र्याली तथा सभा
८- २०७६ मंसिर १४ गते दिउँसो १ बजे दार्चुला गोकुलेश्वर र्याली तथा सभा
९- २०७६ मंसिर १५ गते विहान ८ बजे गोठालापानी , बैतडी र्याली तथा सभा
१०- २०७६ मंसिर १५ गते दिउँसो ३ बजे दिपायल डोटी र्याली तथा सभा
११- २०७६ साल मंसिर १७ गते दिउँसो १२ बजे महेन्द्रनगरको मदन चौक समापन सभा
