तिलक थापा
बाग्लुङ । बाग्लुङको बुर्तिबाङ बजारमा शनिबार संयुक्त वाम गठबन्धनको चुनावी सभा हुँदैछ । सभालाई पूर्व प्रधानमन्त्री एवं नेकपाका अध्यक्ष पुष्पकमल दाहाल ‘प्रचण्ड’, राष्ट्रिय जनमोर्चाका अध्यक्ष चित्रबहादुर केसी र नेकपाका महासचिव बिष्णु पौडेलले सम्बोधन गर्ने कार्यक्रम छ ।
मंसिर १४ नजिकिँदै जाँदा बाग्लुङमा चुनावी सरगर्मी समेत बढ्दै गएको छ । उपनिर्वाचनमा बाग्लुङ २ (ख) बाट वाम गठबन्धनका तर्फबाट राजमोका खिमविक्रम शाही प्रदेश सभा सदस्यको उम्मेद्वार हुनुहुन्छ ।
सो क्षेत्रमा उम्मेद्वारसहित गठबन्धनका नेता कार्यकर्ताहरु घरदैलो अभियान, जनभेटघाट तथा चुनावी सभाको कार्यक्रम गरी जनताको मन जित्न ब्यस्त छन् । यसै सन्दर्भमा शुक्रबार ढोरपाटन नगरपालिका–४ छोरेगाऊँमा चुनावी सभा सम्पन्न भएको छ।
कार्यक्रममा बोल्दै उम्मेद्वार शाहीले चुनावको समयमा गाऊँ गाऊँमा झुटा आश्वाशन बाँडिएको भन्दै भ्रमको पछी नलाग्न अनुरोध गर्नुभयो । उहाँले आश्वासनले भन्दा पनि भिजनले विकास गर्ने भएकोले आफूसँग भिजनसहितका एजेण्डा भएको स्पष्ट पार्नुभयो ।
कार्यक्रममा राष्ट्रिय जनमोर्चा केन्द्रीय सदस्य एवं गण्डकी प्रदेशसभा सदस्य पियारी थापा र ढोरपाटन नगरपालिकाका मेयर देव कुमार नेपालीले मन्तब्य राख्नुभएको थियो ।
