काठमाडौं । संसद सचिवालकी कर्मचारीमाथि बलात्कारको प्रयास गरेको अभियोगमा कारागारमा रहेका निवर्तमान सभामुख कृष्णबहादुर महरालाई थुनामै राख्ने वा साधारण तारेखमा छोड्ने विषयमा आजदेखि बहस सुरु हुँदैछ ।
महराले थुनामा पठाउने काठमाडौं जिल्ला अदालतको आदेशविरुद्ध शुक्रबार उच्च अदालत पाटनमा निवेदन दर्ता गराएका छन् । उनको मुद्दाको पेशी आज (शुक्रबार)लाई तोकिएको छ।
जिल्ला अदालत, काठमाडौंका न्यायाधीश सुदर्शनराज पाण्डेको इजलासले १८ कात्तिकमा महरालाई पुर्पक्षका लागि थुनामा पठाउने आदेश दिएको थियो । त्यसयता उनी डिल्लीबजार कारागारमा छन् ।
उच्च अदालत स्रोतका अनुसार अदालतले कैफियत प्रतिवेदन मगाएर अध्ययनपछि मुद्दा अघि बढ्छ। अन्तिम आदेश हुन दुईमहिनासम्म समय लाग्न सक्छ ।
घटना विवरण कागजात, जाहेरी दरखास्त, मौकामा कागज गर्नेहरुको बयान र तत्काल प्राप्त प्रमाणको आधारमा महरा कसूरदार होइन भन्न नसकिएको भन्दै उनलाई थुनामा पठाउन आदेश भएको थियो ।
महरालाई १९ असोजमा प्रहरीले बालुवाटारस्थित सभामुखको सरकारी निवासबाटै पक्राउ गरेको थियो ।
