प्युठान । मंसिर १४ गते हुने उप निर्वाचनका लागि प्युठानको ऐरावती गाउँपालिका वडा नं २ मा वाम गठबन्धनको तर्फबाट राष्ट्रिय जनमोर्चाका उम्मेद्वार हुनुहुन्छ, भक्त बहादुर बिक । राजमोको बलियो पकड भएको साविकको बरौंला गाविसमा बहुदलीय व्यवस्था स्थापना भएयता लगातार राजमोले नै चुनाव जित्दै आएको छ ।
गत स्थानीय निर्वाचनमा पनि सो वडाबाट राजमोका केशव आचार्य निर्वाचित हुनुभएको थियो । आचार्य जिल्ला समन्वय समितिको संयोजक बनेपछि खाली भएको स्थानमा उपानिर्वाचन हुन लागेको हो ।
राजमोको बलियो पकड क्षेत्र बरौंलामा नेकपाले पनि समर्थन गरेपछि अत्यधिक मतले निर्वाचन जित्नेमा उम्मेद्वार भक्त बहादुर बिक ढुक्क देखिनुहुन्छ । ‘हामीले जनताको पक्षमा गरेका काम र आर्जन गरेको जनविश्वास नै चुनाव जित्ने आधार हो’ बिक भन्नुहुन्छ, ‘त्यसमाथि राजमोको बलियो क्षेत्र भएकोले चुनावमा अत्यधिक मतले विजयी हुनेमा हामी ढुक्क छौैं ।’
अध्यक्षका उम्मेद्वार बिकले वडा अध्यक्षमा निर्वाचित भएपछि अहिलेसम्म जसरी जनताको घरदैलोमा पुगेर उनीहरुका समस्या समाधान गर्ने प्रयास गरिएको थियो, अब थप घनिभुत ढंगले लाग्ने प्रतिवद्धता जनाउनुभयो । उहाँले जनताको विकास निर्माणका चाहनालाई सबै ठाउँमा समानुपातिक ढंगले पुर्याउने योजना पनि सुनाउनुभयो ।
प्युठानको बरौंला क्षेत्रमा राष्ट्रिय जनमोर्चाले जनताका पक्षमा गरेको संघर्षकै कारण जनविश्वास कायम राख्न सफल भएको जिल्ला समन्वय समितिका संयोजक आचार्य बताउनुहुन्छ । त्यसमाथि राजमोले स्थानीय विकासका लागि गरेको पहल पनि जनविश्वास आर्जन गर्ने अर्को कारण बनेको छ ।
स्थानीय स्तरमा बाटो, विजुली, सिंचाई लगायतका पूवार्धार पुर्याउन राजमोले प्रदेश सरकारदेखि स्थानीय तहसम्मलाई बारम्बार घच्घच्याउने गरेको छ । साविक बरौंलाको ३ र ४ नं वडा जो सबैभन्दा दुरदराज मानिन्छ, त्यहाँ पनि राजमोकै पहलमा भर्खरै मोटरबाटो पुगेको अध्यक्ष आचार्य बताउनुहुन्छ ।
ऐरावती–२ को उपनिर्वाचनले राजमोका नेता कार्यकर्तालाई समेत उत्साहित बनाएको छ । प्रत्येक बुथ स्तरमा चुनाव प्रचार समिति बनाएर प्रचार प्रसारमा लागिएको राजमो नेता आनन्द शर्माले जानकारी दिनुभयो । उम्मेद्वारसहित वाम गठबन्धनको प्रचार टोली यतिबेला मतदाताको घरदैलोमा भेटघाट गर्न र मत माग्न ब्यस्त छ ।
