काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले प्रहरीले आफैँ हतियार राखेको आफ्नो पार्टीविरुद्ध भ्रमपुर्ण प्रचार गरेको दाबी गरेको छ । प्रहरीद्वारा शनिबार बरामद भएको भनिएका हतियार आफ्नो नभएको नेकपाले दावी गरेको हो।
प्रहरीले शनिबार कपिलवस्तुको शिवनगर नगरपालिका–१ बाट ५ थान एसएमजी राइफल, त्यसमा प्रयोग हुने म्यागजिन १३ थान र ३९० राउन्ड गोली बरामद गरिएको दावी गरेको थियो । उक्त हतियार विप्लव समूहको रहेको प्रहरीको भनाइ थियो ।
तर, प्रहरीले आफ्नो पार्टीमाथि दमन गर्ने योजना अनुरुप प्रहरी आफैँले उक्त हतियारहरु राखेर भ्रमपूर्ण प्रचार गराएको भन्दै त्यस्तो प्रचार नगर्न नेकपाले चेतावनी दिएको छ ।
विप्लव समूहका राप्ती ब्युरो इन्चार्ज समरले आइतबार विज्ञप्ति जारी गर्दै भनेका छन्, ‘नेकपामाथि दमन गर्ने सरकारी षडयन्त्रअनुरुप त्यसप्रकारको नियोजित, भ्रमपूर्ण र कपोलकल्पित प्रचार गराइएको र यसप्रकारको षडयन्त्र नगर्न चेतावनी दिन चाहन्छौं ।’
