काठमाडौं । नेपाल उद्योग वाणिज्य महासंघमा शेखर गोल्छा अध्यक्ष बन्ने पक्का भएको छ । महासंघले वरिष्ठ उपाध्यक्ष नै अध्यक्ष बन्न पाउने विधानको व्यवस्था कायमै राखेकाले गोल्छा अध्यक्ष बन्न बाटो खुलेको हो ।
गोल्छा महासंघका वरिष्ठ उपाध्यक्ष हुन् । विधानको सो व्यवस्था संशोधन गर्ने वा नगर्ने बारे महासंघमा विवाद थियो । तर, महासंघको बिहीबार बसेको कार्यकारिणी समितिको बैठकले विधान संशोधन नगर्ने स्थायी समितिको बैठकको निर्णय अनुमोदन गरेको छ ।
भोलि शुक्रबार महासंघले विशेष साधारण सभा गर्ने र त्यही सभाबाट विधान संशोधन गर्ने तयारी गरेको थियो । तर, स्थायी समितिको केही दिन अघिको वैठकले साधारण सभा रोक्न कार्यकारिणी समितिलाई सिफरिस गरेको थियो ।
विधानको विभिन्न ३५ वटा बुँदा संशोधन गर्ने विषयको मस्यौदा समेत बनिसकको र छलफलमा गएको अवस्थालाई रोक्ने औपचारिक निर्णय गरिएको हो। आजको बैठकले महासंघको महानिर्देशकमा सरकारका पूर्वसचिव धरणीधर खतिवडालाई नियुक्ति गर्ने निर्णय अनुमोदन गर्ने निर्णय गरेको छ।
त्यस्तै गरि सरकारले अगाडी बढाएको सामाजिक सुरक्षा योजना र सामाजिक सुरक्षा कोषका विषयमा महासंघका सदस्य संघ संस्थाहरू जिल्लानगर उवासंघहरू, वस्तुगत संघहरू, एसोसिएट उद्योग प्रतिष्ठाहरूसँग यथाशीघ्र छलफल गरी अघि बढाउने निर्णय समेत गरेको छ।
उद्योगी तथा व्यवसायीहरूमाथि विभिन्न समयमा राज्यका तर्फबाट हुँदै आएका व्यवहारले स्वदेशी एवं विदेशी लगानीको वातावरणमा समेत प्रतिकुल प्रभाव पर्नसक्ने सम्भावनातर्फ ध्यानाकर्षण गराउँदै मुलुकभित्रका उद्यमी व्यवसायीलाई राज्यका सवै सरोकारवाला निकायबाट कानुनी शासनको अवधारणा अनुरुप सम्मानजनक व्यवहार गर्न सरकारको ध्यानाकर्षण गराउने निर्णय समेत गरेको छ।
