मेघराज रिष्मेली, ओसाका जापान ।
जापानमा एकजना नेपालीको मृत्यु भएको छ । जापानको ओसाकामा कुक भिसामा कार्यरत गुल्मी ज़िल्ला मुसिकोट नगरपालिका वाड नम्बर ९ डासिकोटका ३६ वर्षीय नारायणबहादुर खत्रीको मंगलबार मृत्यु भएको हो ।
करिब २ वर्षअघि मात्र जापान आएका खत्री लामो समयदेखि मुटुसम्बन्धी बिरामी रहेको र हाल उपचारका क्रममा अस्पतालमै मृत्यु भएको जापान नेपाली एकता समाजका केन्द्रीय उपाध्यक्ष भिम केसीले युगदर्शनलाई जानकारी दिनु भयो ।
११ दिनअघि बेहोस भएपछि अस्पतालमा पुर्याइ उपचारका क्रममा मंगलबार बिहान खत्रीको मृत्यु भएको अस्पतालले जानकारी दिएको पारिवारिक स्रोतलाई उदृत गर्दै केसीले जानकारी दिनुभयो ।
मृतक खत्री श्रीमतीसहित जापान बस्दै आउनुभएको थियो । श्रीमती जापान आएको पनि अझै एक वर्ष नपुगेको केसीले जानकारी दिनुभयो ।
मृतकका घरमा वृद्ध बुवा, आमा, एक छोरा र एक छोरी रहेका छन् । लामो समयदेखि मुटु रोगी खत्रीको अगस्ट १९ तारिक बिहीबार जापान मै अन्तिम संस्कार गरिने भएको छ ।
