खिमराज चालिसे, चंडिगढ ।
अर्घाखाँची जिल्लाको भूमिकास्थान नगरपालिका वार्ड नम्बर–१ सिनेटि निवासी वर्ष ४४ का श्रीराम खनाल (दुर्गा) दुई वर्षदेखि सम्पर्कविहीन भएका छन् । भारतको हिमाञ्चल प्रदेशको सुन्दरनगरबाट उनी ७ जुन २०१९ देखि सम्पर्कविहीन भएका हुन् ।

आफ्नो झोला तथा अन्य सामान सबै छोडेर एक्कासी बेपत्ता भएका थिए । उनले सम्पर्कविहीन हुनु एक दिन पहिला मालिकसँग सोलाङ्ग हिमाञ्चलजाने बाटो सोधेको बुझिएको छ ।

उनको खोजी कार्यमा सहयोग गरिदिन आफन्तले मूल प्रवाह अखिल भारत नेपाली एकता समाजसँग आग्रह गरेका छन् ।

मूल प्रवाह संगरुर नगर समितिले गहुँगोरो वर्ण भएका करिब ५ फुट उचाईका श्रीरामलाई कसैले देखे, भेटेमा मूल प्रवाहको कार्यालय वा, संगरुर महिला नगर संयोजक लक्ष्मी खनाल अथवा प्रहरीलाई जानकारी गराइदिन आग्रह गरेको छ ।