मेघराज रिष्मेली, जापान ।
जापानको ओसाकामा बागलुङ जिल्लाको गल्कोट नगरपालिका-२ चिनामाली नरेठांटीकी एक महिलाको मृत्यु भएको छ ।

हाल जापानको ओसाकालाई कर्मथलो बनाउँदै आएका तिलबहादुर भण्डारीकी धर्मपत्नी ४२ वर्षीया हरिकला भण्डारीको अगष्ट ८ तारिकका दिन उपचारको क्रममा मृत्यु भएको हो ।

मृतक भण्डारीले एक वर्षअघि पनि पत्थरीको शल्यक्रिया गराउनुभएको थियो । पुनः फोक्सोमा पत्थरी भएपछि विगत एक महिनादेखि अस्पताल भर्ना भई उपचाररत रहनुभएको थियो ।

उपचारकै क्रममा गत आइतबार दुःखद निधन भएको जापान नेपाली एकता समाजका केन्द्रीय सदस्य एवम् क्षेत्रीय समिती ओसाकाका अध्यक्ष कमल कार्कीले युगदर्शनलाई जानकारी दिनुभयो।

भण्डारी श्रीमानको पारिवारिक (डिपेन्डेन) भिसामा हुनुन्थ्यो । भण्डारी श्रीमान, एक छोरी र एक छोरा सँगै विगत एक दशकदेखि जापान बस्दै आउनुभएको थियो ।