इभिया । ग्रीसको इभिया टापुको जङ्गलमा लागेको भिषण डढेलो नियन्त्रण गर्न अग्निनियन्त्रक दिनरात सक्रिय रूपमा लागेका छन् । इभिया टापुमा एक सातादेखि भिषण आगलागी भइरहेको छ ।

डढेलोका कारण हजारौं स्थानीयबासी नराम्रोसँग प्रभावित भएका छन् । ग्रीसको सरकारी टेलिभिजन टिभी अर्टले प्रसारण गरेका दृश्य निकै भयानक देखिएका छन् । यी दृश्यमा अग्निनियन्त्रक र स्वयम्सेवीहरू इस्टानिया सहरनजिकैको एउटा ठुलो रुखको आड लिएर निरन्तर आगो निभाउने कार्यमा खटिएको देखाइएको छ, ताकि त्यस ठाउँबाट डढेलो गाउँतिर फैलन नपाओस् ।

त्यस रुखको नजिकै एउटा विशाल आगोको ज्वाला देखिएको छ । डढेलो निरन्तर अघि बढेको भन्दै स्थानीय अधिकारीले एभ्गारिया गाउँका बासिन्दालाई अन्यत्र जान आग्रह गरेको छ । तर धेरैजसो स्थानीयबासी अटेर गरी आफ्नै घरमा बस्न जिद्दी गरिरहेको एक स्थानीय अधिकारीले बताए ।

मध्यग्रीसका गभर्नर फानिस स्पानोसले धेरैजसो गाउँबासीहरू अन्यत्र स्थानान्तरित हुन इच्छुक भए पनि केहीले आगो निभाउने कार्यमा सेवा गरिरहेको बताउनुभयो । स्पानोसले स्थानीयबासीको सहयोगका कारण धेरै गाउँ डढ्नबाट जोगिएको बताउनुभयो ।

डढेलोका कारण इभिया, अथेन्स र ग्रीसका अन्य भागका सयौँ घर ध्वस्त भइसकेका छन् । गत जुलाईको अन्त्यदेखि सुरु भएको डढेलो रोकिने अझै सम्भावना देखिएको छैन । आगोबाट बच्न हजारौँ मानिस अन्यत्र पलायन भएका छन् ।

यता, आगो निभाउने कार्यमा सरकारले पर्याप्त ध्यान नदिएको भन्ने विपक्षीको आलोचनाबिच प्रधानमन्त्री किरियाकोस मिचोटाकिसले राष्ट्रका सामु क्षमा माग्नुभएको छ र जिम्मेवार व्यक्तिलाई दण्ड दिइने बताउनु भएको छ ।

“राज्यका तर्फबाट भएका कमजोरीप्रति म व्यक्तिगत रूपमा क्षमा माग्दछु” मिचोटाकिसले टेलिभिजनमा सम्बोधन गर्दै भन्नुभयो ।

विपक्षी नेता चिप्रासको भनाईको प्रत्यूत्तर दिँदै प्रधानमन्त्री मिचोटाकिसले हालै मात्र ५८० भन्दा बढी स्थानबाट आगो सुरु भएको बताउनुभयो । ग्रीसमा यति भयानक परिस्थिति कहिल्यै सिर्जना नभएको पनि बताउनुभयो ।

नागरिक सुरक्षा उपमन्त्री निकोस हार्डालियासले आगो निभाउन पानी बोक्ने हेलिकोप्टरले पनि अनेक समस्या झेल्नु परिरहेको बताउनुभयो । उहाँले हावाको तिब्र बेग, बाक्लो धुँवा र सीमित दृश्यताको कमी समेतका समस्या देखिएको बताउनुभयो ।

युरोपेली वन डढेलो सूचना केन्द्रले ग्रीसमा गत जुलाई २९ देखि अगस्ट ७ सम्ममा ५६ हजार ६५५ हेक्टर वन क्षेत्र सखाप भएको जनाएको छ ।

नागरिक सुरक्षा अधिकारीका अनुसार युरोपेली युनियन र अन्य मुलुकले ग्रीसको आगलागी नियन्त्रण गर्न हालसम्म २१ वटा विमान, २५० वटा सवारी साधन र १,२०० भन्दा बढी अग्निनियन्त्रक पठाएका छन् । (रासस–एएफपी)