काबुल । तालिबानले अफगानिस्तानमा अर्को प्रान्तीय राजधानी पनि नियन्त्रणमा लिएको दाबी गरेको छ । उनीहरूले तखार प्रान्तको राजधानी तालुकान आइतबारदेखि नियन्त्रणमा लिएको दाबी गरेका हुन ।
प्रान्तीय राजधानी कब्जामा लिएसँगै तखार प्रान्तका धेरै सार्वजनिक संरचना निष्क्रियजस्तै भएका छन् ।
“मुख्य ठाउँ नै नियन्त्रणमा लिएपछि प्रान्त नै निष्क्रिय हुने नै भयो” स्रोतलाई उल्लेख गर्दै तोलो न्युजले लेखेको छ । उनीहरूले प्रान्तीय प्रहरी कार्यालयसमेत नियन्त्रणमा लिएको जनाइएको छ ।
तालिबान लडाकुले यसअघि अरू तीन प्रान्तीय राजधानी पनि नियन्त्रणमा लिइएको घोषणा गरेका थिए । योसमेत गरी उनीहरूले अफगानिस्तानका चार प्रान्तीय राजधानी कब्जा गरेका छन् । तर सो क्षेत्रमा तालिबानी र अफगान सेनाबिच सङ्घर्ष भने जारी नै रहेको जनाइएको छ ।
पछिल्लो तीन दिनमा चार प्रान्तीय राजधानी आफूहरूले कब्जामा लिएको लडाकुहरूले सोमबार दाबी गरेका छन् । लडाकुले यसअघि देशको कुन्दुज प्रान्तको राजधानी नियन्त्रणमा लिएको दाबी गरेका हुन् । उनीहरूले कुन्दुज प्रान्तको प्रहरी मुख्यालय, गभर्नरको कार्यालय, कारागारलगायत पनि नियन्त्रणमा लिएको जानकारी दिएका छन् ।
तालिबान लडाकुले त्योभन्दा अगाडि सबरगान र जारान्ज प्रान्तीय राजधानी नियन्त्रणमा लिइएको दाबी गरेका थिए । सुरुमा गत शुक्रबार तालिबानले दक्षिण पश्चिमी प्रान्त निम्रोेजको राजधानी जारान्ज कब्जामा लिएको र त्यसपछि उत्तरी क्षेत्रको जोजन राज्यको राजधानी सबरगान सहर आफ्नो नियन्त्रणमा आएको तालिबानले जनाएको छ ।
पश्चिमको हेरात, दक्षिणको कान्दाहार र लस्कर गाहसहितका प्रमुख सहर पनि क्रमशः आफ्नो नियन्त्रणमा लिँदै जाने तालिबानको रणनीति रहेको तालिबान समूहका एक कमान्डरले बताएका छन् ।
अफगानिस्तानको रक्षा मन्त्रालयका प्रवक्ताले भने सरकारी सुरक्षाकर्मी अहिले पनि सहरमा रहेको र चाँडै नै तालिबान लडाकुलाई हटाउने दाबी गर्नुभएको छ । (रासस/एनआई)
