बेइजिङ । चिनियाँ राष्ट्रपति सी जिनपिङले कोरोना विरुद्धको खोप आम जनसमुदायलाई उपलब्ध गराउनका लागि आपसी सहयोगका साथ अघि बढ्न अन्तर्राष्ट्रिय समुदायलाई आग्रह गर्नुभएको छ ।
अहिले पनि कोरोना सङ्क्रमण विश्वका देशमा प्रमुख चुनौतीकै रूपमा देखिएको र यसको निराकरणका लागि आवश्यक सहयोग गर्नुपर्नेमा उहाँले जोड दिनुभयो ।
कोभिड–१९ को–अपरेशन फोरमको हालै सम्पन्न एक बैठकमा राष्ट्रपति सि जिनपिङले यस्तो आग्रह गर्नुभएको थियो ।
राष्ट्रपति सि जिनपिङले भन्नुभयो– “अहिलेको विश्वमा पनि कोरोना महामारी सबैको एक चुनौतीका रूपमा रहेको छ र यसका कारणबाट हुन सक्ने क्षतिको आँकलन अझै असम्भव भएकोतर्फ सबैको ध्यान जानुपर्ने छ ।”
अहिले पनि विश्व यो महामारीसँग सङ्घर्ष गरिरहेको र कोरोना महामारीको नियन्त्रणका लागि अहिले देखिएको एक मात्र उपाय भनेको नै खोप भएकाले विश्वले आपसमा सहयोगका साथमा अघि बढ्नुपर्ने उहाँको भनाइ छ ।
राष्ट्रपति जिनपिङले हालसम्म चीनले विश्वका कम्तीमा पण्नि एक सय देशलाई खोप अनुदान दिएको जानकारी पनि दिनुभयो । साथै चीनले हालसम्म विश्वका करिब ६० देशमा खोप निर्यात गरिरहेको जानकारी दिनुभयो । हाल तेस्रो विश्वका कतिपय देशमा खोपको खाँचो महसुस भइरहेकाले सबैले यसको मात्रा प्राप्त गर्न पाउन् भनेर सबै मिलेर आपसमा सहयोग गर्नुपर्ने उहाँको भनाइ छ ।
चीनले हालै मात्र यसै वर्षभित्र विश्वका विभिन्न देशलाई कम्तीमा पनि दुई अर्ब डोज कोरोना खोप सहयोग दिने घोषणा गरेको छ । चीनले यसै वर्षको अन्तिमसम्ममा कोभ्याक्स कार्यक्रममा एक करोड अमेरिकी डलर सहयोग गर्ने पनि बताएको छ । (रासस/सिन्ह्वा)
